Sharaǵa Aqtóbe oblysy ákimi Ońdasyn Orazalin, QR Qazaqstan halqy Assambleiasy tóraǵasynyń orynbasary Marat Ázilhanov, Koreia Respýblikasynyń Tótenshe jáne Ókiletti Elshisi Ký Hong-Sok, Koreia Respýblikasy Elshisiniń konsýly
Kim Von Ion bikesh, Qazaqstan halqy Assambleiasynyń músheleri, etno mádeni birlestikterdiń tóraǵalary qatysty.
Koreia Respýblikasynyń Qazaqstandaǵy Tótenshe jáne Ókiletti Elshisi Ký Hong-Sok quttyqtaý sózinde:
– Osydan 85 jyl buryn Stalin úkimetiniń buiryǵymen kárister qiyr shyǵysta poiyzǵa otyrǵyzylyp Qazaqstanǵa kúshtep qonys aýdarylǵan. Sol kezde Qazaqstan halqy asharshylyq pen sharýashylyqty uiymdastyrý saldarynan qiyn jaǵdaida bolǵanymen káristerge baspana, kiim-keshek, azyq-túlik jaǵynan kómek qolyn sozyp, olardy jańa jaqyn kórshi, otbasy múshesi retinde qarsy aldy.
Búgingi Alǵys aitý eskertkishiniń ashylý saltanaty káristerdiń 85 jyl ótken soń Qazaqstan halqynyń yntymaqtastyǵynyń asqaq rýhyn eske alyp alǵysyn bildirý úshin daiyndalǵan shara, – dep atap ótti.
– Alǵys aitý kúni – qazaqstandyqtardan qoldaý tapqan meiirimdiliktiń, ózara syilastyqtyń, dostyq pen yntymaqtastyqtyń merekesi. Aqtóbe oblysynda Alǵys aitý kúni bolǵan jarqyn oqiǵa - atalmysh eskertkishtiń ashylýy boldy. Bul bizdiń halyqqa degen shynaiy rizashylyqtyń kýási. Qurmetti Elshi, Aqtóbe óńiriniń turǵyndary atynan Sizge jáne siz arqyly Koreia Respýblikasynyń búkil halqyna alǵysymdy bildiremin! – dedi oblys ákimi Ońdasyn Orazalin.
Jinalǵandardy Alǵys aitý kúnimen sondai-aq, Qazaqstan halqy Assambleiasy tóraǵasynyń orynbasary Marat Ázilhanov ta quttyqtap, Qazaqstan halqy Assambleiasy men etnomádeni birlestikterdiń birqatar múshesin marapattady.
Aqtóbe oblysynyń káristeri atynan «Qazaq halqyna alǵys» músindik kompozitsiiasy – qazaq jáne káris áielderiniń músinderi jasalǵan eskertkish.
Qazaq áieli káris áieline qazaqi qonaqjailylyqtyń belgisi retinde kesemen qymyz usynyp tur. Bul deportatsiianyń aýyr kezinde myńdaǵan káristiń aman qalýyna kómektesken. Áielderdiń artyndaǵy shańyraqty ustap turǵan aq qustyń stildengen qanattary – qazaq úileriniń belgisi. Kompozitsiianyń jalpy biiktigi – 4,7 metr, eni – 4,5 metr.
