Aqtóbe oblysynda áleýmettik nan qory jetkilikti. Óńirdegi «Ramazan», «Atameken» jáne «Nanym» nan shyǵarýshy kásiporyndary naryqty tolyqtai ónimmen qamtyp otyr, dep habarlaidy Dalanews.kz.
Táýligine 34 myń bólke nan dúken sórelerine jetkizilip, 106 teńgeden satylýda.
Al «Aqtóbe nan» 1-surypty unnyń bolmaýyna bailanysty áleýmettik nandy pisirýdi ýaqytsha toqtatty. Buǵan - kásiporynnyń «Aqtóbe» ÁKK» AQ aldyndaǵy forvardtyq kelisimshart aiasynda qalyptasqan bereshegine qatysty. Qaryz soma - memlekettik biýdjetten bólingen 170 mln teńgeni quraidy. Zaýyt bul berejaqty óteýden bas tartyp, esepten shyǵarýdy surap otyr. «Aqtóbe» áleýmettik-kásipkerlik korporatsiiasy kúni erteń 1-surypty undy jetkizýge daiyn, tek «Aqtóbe nan» tarapynan kepildeme hat berilý kerek.
«Aqtóbe nan» JShS basshylyǵy kótergen qaryz somany esepten shyǵarý máselesi júzege asyrylmaidy. Óitkeni, bul - birinshiden, biýdjettiń aqshasy. Ekinshiden, aqsha qaitarylǵan jaǵdaida biz jańa ónim alamyz», - deidi aýyl sharýashylyǵy basqarmasynyń bólim basshysy Snejanna Qulekenova.
Búginde óńirde áleýmettik qalypty nandy birneshe kásiporyn óndiredi. Atap aitqanda, «Ramazan» JShS táýligine 12 myń dana; «Atameken» JShS táýligine 12 myń dana «Nanym» kásiporny táýligine 6 myń dana áleýmettik nan pisiredi. Qazirgi ýaqytta – «Aqtóbe nan» JShS-niń kólemin basqa zaýyttar igerýde. Bul naryqtaǵy júktemeni teńestirýge jáne áleýmettik nan jetkiziliminiń úzdiksiz bolýyna múmkindik berip otyr.
Jaýapty qurylymdardyń málimetinshe, áleýmettik nan saýda núktelerine turaqty jetkizilip jatyr, baǵa turaqtylyǵy saqtalǵan. Sondyqtan óńirde áleýmettik nan boiynsha alańdaýǵa negiz joq.
