Búgin, 28 mamyr kúni Aqtaýlyq bloger Azamat Sársenbaev Instagram paraqshasynda jariialaǵan videodaǵy sózi úshin sot sheshimimen 20 táýlikke qamaýǵa alynǵanyn habarlady. Ol jáne onyń qorǵaýshylary bul sheshimdi ádiletsiz dep esepteidi, dep habarlaidy Dalanews.kz.
Blogerge QR Ákimshilik quqyq buzýshylyq týraly kodeksiniń 73-baby (Jala jabý) boiynsha aiyp taǵylyp, 20 táýlik ákimshilik qamaý jazasy taǵaiyndalǵan. Oqiǵanyń mán-jaiyn ol Instagram-da baiandady.
Sársenbaevtyń aitýynsha, sotqa deiingi jaǵdai onyń Instagram-daǵy pikirine bailanysty bastalǵan. Ol pikirinde doner dúkeni iesi men klient áiel arasyndaǵy daý-damaiǵa qatysty óz kózqarasyn bildirip, kásipkerdiń sózin keltirgen.
– Dostar, sot sheshimimen meni 20 táýlikke qamady. Bul qalai, ne úshin – túsiniksiz. Bul – naǵyz basynýshylyq. Qazir men apelliatsiialyq sot sheshimine deiin arnaiy qabyldaý ornyna bara jatyrmyn. Meni jala jabý baby boiynsha qamady. Antikorrýptsiialyq qyzmetke qatysty pikir bildirgenim úshin. Bul – qaýipti jaǵdai. Eger bul zańdy bolsa, endi kez kelgen azamat, qoǵamdyq belsendi bilikke qarsy sóz aitsa, qamalýy múmkin, – dedi Sársenbaev.
Máseleniń máni buǵan deiin qoǵamdyq tamaqtaný ornynda bolǵan janjalǵa bailanysty. Sol kezde mekeme iesi áiel men onyń balalary bedeline nuqsan keltirmek boldy dep aiyptap, «bul mekemeniń iesi – Antikor» dep aiqailaǵan.
– Qoǵamdyq aialdamada ornalasqan 60 sharshy metr jer telimin 650 sharshy metrge deiin keńeitip, zańǵa sai kelmeitin saýda ortalyǵyn salý – bilik tarapynan qoldaý bolmasa múmkin emes. Eger ákimdik mundaidy kórip turyp úndemese, demek, ruqsat bergen, – degen edi bloger óz jazbasynda.
Blogerdiń advokaty Seri Abýl bul sheshimge qarsy apelliatsiialyq shaǵym túsirip jatyr. Onyń aitýynsha, bul tek ádiletsiz ǵana emes, zańsyz sheshim.
– Biz shok boldyq. QK-niń 73-babynda jábirlenýshi tek jeke tulǵa bola alady, al bul jaǵdaida memlekettik organ – Antikor ózin jábirlenýshi retinde kórsetip otyr. Bul – zańǵa qaishy. Bundai bappen qylmystyq is qozǵaý – zańsyz. Mundai normany Májilis ainalyp ótip, ózderi oilap tapqandai kórinedi. Isti toqtatýdy surap ótinish jazdym, biraq nátije bolmady. Mundai jaǵdaimen alǵash ret kezdesip otyrmyn, – dedi qorǵaýshy.
Buǵan deiin Seri Abýl sotqa resmi ótinish jiberip, quqyqtyq ustanymyn túsindirgen. Onda QR ÁQBtK-niń 73-3-babynyń 2-bóligine (Jala jabý) sáikes ákimshilik is qozǵaý negizsiz ekenin kórsetken. Advokattyń aitýynsha, kodeks normasyna sáikes, jala jabý baby boiynsha quqyq buzýshylyq obektisi bolyp tek jeke tulǵa sanalady. Al memlekettik organ mundai baptyń sheńberinde jábirlenýshi bola almaidy, sondyqtan quqyq buzýshylyq obektisi joq. Osy negizde advokat isti zańsyz dep tanyp, óndiristi toqtatýdy suraǵan.
Alaida bul dálelderdi sot elemegen.
