Qazaqstan Respýblikasynyń Mádeniet jáne aqparat ministri Aida Balaevanyń jetekshiligimen Aqtaýda TÚRKSOI elderi mádeniet ministrleriniń 42-otyrysy ótti, dep habarlaidy Dalanews.kz
Jiynda Ázerbaijandaǵy Gabala qalasynda ótken Túrki memleketteri uiymynyń XII sammitinde jariialanǵan qorytyndy qujattar men prezidentterdiń tapsyrmalary talqylandy. Otyrys barysynda 2026 jylǵa arnalǵan TÚRKSOI uiymynyń jumysyn jetildirý boiynsha jumys tobyn qurý týraly sheshim qabyldandy.
Sonymen qatar «Aqtaý – Túrki áleminiń mádeni astanasy» jylynyń qorytyndysy shyǵaryldy. Aida Balaeva óz sózinde aitýly jyl aiasynda keń aýqymdy jumys atqarylǵanyn atap ótti.
Jiynda TÚRKSOI Bas hatshysy Sultan Raev quttyqtaý sóz sóiledi. Ol biyl uiym úsh myńnan astam ártistiń túrli is-sharalarǵa qatysýyn uiymdastyryp, júzdegen basylym men tsifrlyq material shyǵarǵanyn tilge tiek etti.
«2025 jyly «Aqtaý – túrki áleminiń mádeni astanasy» jobasyn qoldaǵany úshin Qazaqstan Respýblikasynyń Prezidenti Qasym-Jomart Toqaevqa shynaiy alǵysymdy bildiremin. Gabalada ótken sammitte Qazaqstan Prezidentiniń sóilegen sózi bul mártebeniń ortaq mádeni keńistigimiz úshin mańyzyn aiqyndai tústi. Biyl biz tarihi oqiǵanyń kýási boldyq: memleket basshylary ýaqyt talabyna sai TÚRKSOI-dy nyǵaitý qajettigin atap, Bas hatshylyqqa osy jumysty bastaýdy tapsyrdy. Bul jai ǵana sheshim emes – túrki álemi elderiniń mádeni yntymaqtastyǵynyń bolashaǵyn aiqyndaityn strategiialyq kezeń», – dedi Bas hatshy.
Otyrys sońynda Aida Balaeva 2026 jyly Túrki áleminiń mádeni astanasy mártebesi Ándijan qalasyna beriletin bolǵandyqtan, TÚRKSOI-dyń ýaqytsha úilestirýshisi mindetin ózbekstandyq áriptesi Ozodbek Nazarbekovke tapsyrdy.
Kezdesýdiń sońynda TÚRKSOI-ǵa múshe elderdiń deklaratsiiasy qabyldandy.
Otyrysta QR Mádeniet jáne aqparat ministri Aida Balaeva, TÚRKSOI Bas hatshysy Sultan Raev, Túrikmenstannyń mádeniet ministri Atageldy Shamyradov, Ózbekstannyń mádeniet ministri Ozodbek Nazarbekov, Ázerbaijan Mádeniet ministriniń orynbasary Mýrad Gýseinov, Qyrǵyzstan Mádeniet, aqparat, sport jáne jastar saiasaty ministriniń orynbasary Askaraly Madaminov, Túrkiia Mádeniet jáne týrizm ministriniń orynbasary doktor Serdar Cham, sondai-aq Mańǵystaý oblysy ákiminiń orynbasary Tilegen Ábishev qatysty.
Túrki mádenieti halyqaralyq uiymy (TÚRKSOI) ortaq materialdyq jáne mádeni murany saqtaý, damytý jáne bolashaq urpaqqa jetkizý maqsatynda túrki elderi men aimaqtaryn biriktirý maqsatynda qurylǵan.
