قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆانىڭ جەتەكشىلىگىمەن اقتاۋدا تۇركسوي ەلدەرى مادەنيەت مينيسترلەرىنىڭ 42-وتىرىسى ءوتتى، دەپ حابارلايدى Dalanews.kz
جيىندا ازەربايجانداعى گابالا قالاسىندا وتكەن تۇركى مەملەكەتتەرى ۇيىمىنىڭ XII سامميتىندە جاريالانعان قورىتىندى قۇجاتتار مەن پرەزيدەنتتەردىڭ تاپسىرمالارى تالقىلاندى. وتىرىس بارىسىندا 2026 جىلعا ارنالعان تۇركسوي ۇيىمىنىڭ جۇمىسىن جەتىلدىرۋ بويىنشا جۇمىس توبىن قۇرۋ تۋرالى شەشىم قابىلداندى.
سونىمەن قاتار «اقتاۋ – تۇركى الەمىنىڭ مادەني استاناسى» جىلىنىڭ قورىتىندىسى شىعارىلدى. ايدا بالايەۆا ءوز سوزىندە ايتۋلى جىل اياسىندا كەڭ اۋقىمدى جۇمىس اتقارىلعانىن اتاپ ءوتتى.
جيىندا تۇركسوي باس حاتشىسى سۇلتان رايەۆ قۇتتىقتاۋ ءسوز سويلەدى. ول بيىل ۇيىم ءۇش مىڭنان استام ءارتىستىڭ ءتۇرلى ءىس-شارالارعا قاتىسۋىن ۇيىمداستىرىپ، جۇزدەگەن باسىلىم مەن سيفرلىق ماتەريال شىعارعانىن تىلگە تيەك ەتتى.
«2025 جىلى «اقتاۋ – تۇركى الەمىنىڭ مادەني استاناسى» جوباسىن قولداعانى ءۇشىن قازاقستان رەسپۋبليكاسىنىڭ پرەزيدەنتى قاسىم-جومارت توقايەۆقا شىنايى العىسىمدى بىلدىرەمىن. گابالادa وتكەن سامميتتە قازاقستان پرەزيدەنتىنىڭ سويلەگەن ءسوزى بۇل مارتەبەنىڭ ورتاق مادەني كەڭىستىگىمىز ءۇشىن ماڭىزىن ايقىنداي ءتۇستى. بيىل ءبىز تاريحي وقيعانىڭ كۋاسى بولدىق: مەملەكەت باسشىلارى ۋاقىت تالابىنا ساي تۇركسوي-دى نىعايتۋ قاجەتتىگىن اتاپ، باس حاتشىلىققا وسى جۇمىستى باستاۋدى تاپسىردى. بۇل جاي عانا شەشىم ەمەس – تۇركى الەمى ەلدەرىنىڭ مادەني ىنتىماقتاستىعىنىڭ بولاشاعىن ايقىندايتىن ستراتەگيالىق كەزەڭ»، – دەدى باس حاتشى.
وتىرىس سوڭىندا ايدا بالايەۆا 2026 جىلى تۇركى الەمىنىڭ مادەني استاناسى مارتەبەسى ءاندىجان قالاسىنا بەرىلەتىن بولعاندىقتان، تۇركسوي-دىڭ ۋاقىتشا ۇيلەستىرۋشىسى مىندەتىن وزبەكستاندىق ارىپتەسى وزودبەك نازاربەكوۆكە تاپسىردى.
كەزدەسۋدىڭ سوڭىندا تۇركسوي-عا مۇشە ەلدەردىڭ دەكلاراسياسى قابىلداندى.
وتىرىستا ق ر مادەنيەت جانە اقپارات ءمينيسترى ايدا بالايەۆا، تۇركسوي باس حاتشىسى سۇلتان رايەۆ، تۇرىكمەنستاننىڭ مادەنيەت ءمينيسترى اتاگەلدى شامىرادوۆ، وزبەكستاننىڭ مادەنيەت ءمينيسترى وزودبەك نازاربەكوۆ، ازەربايجان مادەنيەت ءمينيسترىنىڭ ورىنباسارى مۋراد گۋسەينوۆ، قىرعىزستان مادەنيەت، اقپارات، سپورت جانە جاستار ساياساتى ءمينيسترىنىڭ ورىنباسارى اسكارالى مادامينوۆ، تۇركيا مادەنيەت جانە تۋريزم ءمينيسترىنىڭ ورىنباسارى دوكتور سەردار چام، سونداي-اق ماڭعىستاۋ وبلىسى اكىمىنىڭ ورىنباسارى تىلەگەن ابىشيەۆ قاتىستى.
تۇركى مادەنيەتى حالىقارالىق ۇيىمى (تۇركسوي) ورتاق ماتەريالدىق جانە مادەني مۇرانى ساقتاۋ، دامىتۋ جانە بولاشاق ۇرپاققا جەتكىزۋ ماقساتىندا تۇركى ەلدەرى مەن ايماقتارىن بىرىكتىرۋ ماقساتىندا قۇرىلعان.
