Aqtaýda 36 shaǵyn aýdanda ornalasqan kóterme-taratý ortalyǵynyń qurylysy jalǵasýda. Búginde qurylys jumysynyń 90%-y oryndalǵan. Óńir basshysy Nurlan Noǵaev jumystardyń barysyn baǵalaý úshin qurylys alańyna bardy, – dep habarlaidy Dalanews.kz Mańǵystaý oblysy ákiminiń baspasóz qyzmetine silteme jasap.
Aqtaýda eki jyl buryn kóterme-taratý ortalyǵynyń qurylysy bastalǵan bolatyn. Ortalyqta jergilikti aýyl sharýashylyǵy óndirýshilerine saýda oryndary beriledi. Bul óz kezeginde ónimdi deldalsyz satýǵa múmkindik jasap, sol arqyly tutynýshylar úshin baǵany turaqtandyrýǵa oń áser etedi.
Kóterme-taratý ortalyǵynyń qurylysymen ainalysatyn "Aqtaý ORTs" JShS direktory Bekzat Jetkizgenovtyń aitýynsha, jobanyń quny shamamen 3,8 milliard teńgeni qurady.
– Qazirgi tańda jumystyń 90%-y oryndaldy. Jobanyń jalpy aýdany shamamen 40 myń sharshy metrdi quraidy. Qurylystyń negizgi kezeńderi aiaqtaldy, sonyń ishinde, ǵimarattyń qabattary salynyp, injenerlik kommýnikatsiialar tartyldy.
Abattandyrý jumysynyń aiasynda asfalt tóselip, nysannyń ainalasy kógaldandyrylady. Jobany eki kezeńmen iske asyrylady: jaz bastalǵanda, sýyq kameralary men tońazytqysh qoimasy, sondai-aq qurǵaq ónimder qoimasyn ashý josparlanǵan.
Ekinshi kezeńi qyrkúiek aiynda júzege asady, iaǵni, azyq-túlik taýarlaryn jetkizetin kóterme-taratý ortalyǵy ashylady degen jospar bar, – dep atap ótti Bekzat Jetkizgenov.
Nysan paidalanýǵa berilgennen keiin pavilondarda fermerler óz ónimderin deldalsyz sata alady. Olarǵa kókónis pen jemis-jidek saqtaityn qoimalar, sondai-aq, tońazytqysh pen muzdatqysh saqtaityn kameralar beriledi.
Bul ortalyqta aýyl sharýashylyǵy ónimderin satatyn adamdar deldalsyz jumys isteidi, sondyqtan, halyq azyq-túlik taýarlaryn barynsha arzan baǵada satyp ala alady.
– Nysan sapaly salynýy úshin qurylys niýanstaryn eskere otyryp, qurylysqa barynsha kúsh salý qajet. Muqiiat baqylaý arqyly ǵana qurylys sapasy standartqa sai bolady degenge kepildik bar.
Bul joba Memleket basshysy Qasym-Jomart Toqaevtyń tapsyrmasy boiynsha júzege asyp jatqanyn este saqtaǵan jón. Azyq-túliktiń 80%-dan astamy bizdiń óńirge syrttan keletinin eskersek, kóterme-taratý ortalyǵyn qurý básekelestik ortany qalyptastyrýǵa jáne taýarlardyń baǵasyn tómendetýge yqpal etedi. Jobany sátti júzege asyrý úshin onyń qurylysyn merziminde aiaqtaý kerek, – dedi oblys ákimi Nurlan Noǵaev.
