اقتاۋدا 36 شاعىن اۋداندا ورنالاسقان كوتەرمە-تاراتۋ ورتالىعىنىڭ قۇرىلىسى جالعاسۋدا. بۇگىندە قۇرىلىس جۇمىسىنىڭ 90%-ى ورىندالعان. ءوڭىر باسشىسى نۇرلان نوعايەۆ جۇمىستاردىڭ بارىسىن باعالاۋ ءۇشىن قۇرىلىس الاڭىنا باردى، – دەپ حابارلايدى Dalanews.kz ماڭعىستاۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
اقتاۋدا ەكى جىل بۇرىن كوتەرمە-تاراتۋ ورتالىعىنىڭ قۇرىلىسى باستالعان بولاتىن. ورتالىقتا جەرگىلىكتى اۋىل شارۋاشىلىعى وندىرۋشىلەرىنە ساۋدا ورىندارى بەرىلەدى. بۇل ءوز كەزەگىندە ءونىمدى دەلدالسىز ساتۋعا مۇمكىندىك جاساپ، سول ارقىلى تۇتىنۋشىلار ءۇشىن باعانى تۇراقتاندىرۋعا وڭ اسەر ەتەدى.
كوتەرمە-تاراتۋ ورتالىعىنىڭ قۇرىلىسىمەن اينالىساتىن "اقتاۋ ورس" ج ش س ديرەكتورى بەكزات جەتكىزگەنوۆتىڭ ايتۋىنشا، جوبانىڭ قۇنى شامامەن 3،8 ميلليارد تەڭگەنى قۇرادى.
– قازىرگى تاڭدا جۇمىستىڭ 90%-ى ورىندالدى. جوبانىڭ جالپى اۋدانى شامامەن 40 مىڭ شارشى مەتردى قۇرايدى. قۇرىلىستىڭ نەگىزگى كەزەڭدەرى اياقتالدى، سونىڭ ىشىندە، عيماراتتىڭ قاباتتارى سالىنىپ، ينجەنەرلىك كوممۋنيكاسيالار تارتىلدى.
اباتتاندىرۋ جۇمىسىنىڭ اياسىندا اسفالت توسەلىپ، نىساننىڭ اينالاسى كوگالداندىرىلادى. جوبانى ەكى كەزەڭمەن ىسكە اسىرىلادى: جاز باستالعاندا، سۋىق كامەرالارى مەن توڭازىتقىش قويماسى، سونداي-اق قۇرعاق ونىمدەر قويماسىن اشۋ جوسپارلانعان.
ەكىنشى كەزەڭى قىركۇيەك ايىندا جۇزەگە اسادى، ياعني، ازىق-تۇلىك تاۋارلارىن جەتكىزەتىن كوتەرمە-تاراتۋ ورتالىعى اشىلادى دەگەن جوسپار بار، – دەپ اتاپ ءوتتى بەكزات جەتكىزگەنوۆ.
نىسان پايدالانۋعا بەرىلگەننەن كەيىن پاۆيلونداردا فەرمەرلەر ءوز ونىمدەرىن دەلدالسىز ساتا الادى. ولارعا كوكونىس پەن جەمىس-جيدەك ساقتايتىن قويمالار، سونداي-اق، توڭازىتقىش پەن مۇزداتقىش ساقتايتىن كامەرالار بەرىلەدى.
بۇل ورتالىقتا اۋىل شارۋاشىلىعى ونىمدەرىن ساتاتىن ادامدار دەلدالسىز جۇمىس ىستەيدى، سوندىقتان، حالىق ازىق-تۇلىك تاۋارلارىن بارىنشا ارزان باعادا ساتىپ الا الادى.
– نىسان ساپالى سالىنۋى ءۇشىن قۇرىلىس نيۋانستارىن ەسكەرە وتىرىپ، قۇرىلىسقا بارىنشا كۇش سالۋ قاجەت. مۇقيات باقىلاۋ ارقىلى عانا قۇرىلىس ساپاسى ستاندارتقا ساي بولادى دەگەنگە كەپىلدىك بار.
بۇل جوبا مەملەكەت باسشىسى قاسىم-جومارت توقايەۆتىڭ تاپسىرماسى بويىنشا جۇزەگە اسىپ جاتقانىن ەستە ساقتاعان ءجون. ازىق-تۇلىكتىڭ 80%-دان استامى ءبىزدىڭ وڭىرگە سىرتتان كەلەتىنىن ەسكەرسەك، كوتەرمە-تاراتۋ ورتالىعىن قۇرۋ باسەكەلەستىك ورتانى قالىپتاستىرۋعا جانە تاۋارلاردىڭ باعاسىن تومەندەتۋگە ىقپال ەتەدى. جوبانى ءساتتى جۇزەگە اسىرۋ ءۇشىن ونىڭ قۇرىلىسىن مەرزىمىندە اياقتاۋ كەرەك، – دەدى وبلىس اكىمى نۇرلان نوعايەۆ.
