QR Úkimetiniń 2025 jylǵy 14 naýryzdaǵy qaýlysymen elimizdiń keibir arnaiy ekonomikalyq aimaqtardyń (AEA) qyzmetine ózgerister men tolyqtyrýlar engizildi. Bul zańnamaǵa sáikes Aqtaý áýejaiy «Aqtaý teńiz porty» AEA quramyna endi, dep habarlaidy Dalanews.kz
Jańa erejede arnaiy ekonomikalyq aimaq Mańǵystaý oblysynyń aýmaǵynda, atap aitqanda, Aqtaý qalasy, Munaily, Qaraqiia jáne Túpqaraǵan aýdandarynyń aýmaǵynda ornalasqan.
Bul AEA óńirdiń jedel damýyn qamtamasyz etý, respýblikanyń ekonomikasyn álemdik sharýashylyq bailanystar júiesine enýin jedeldetý, joǵary tehnologiialyq jáne básekege qabiletti óndiristerdi qurý, jańa ónim túrlerin shyǵarý, investitsiia tartý, naryqtyq qatynastardyń quqyqtyq normalaryn jetildirý, basqarýdyń zamanaýi ádisterin jáne sharýashylyq júrgizý ádisterin engizý, mýltimodaldy habtardy, kólik pen logistikany damytý, óńirdiń týristik áleýetin arttyrý, qazaqstandyq jáne sheteldik týristerdiń qajettilikterin qanaǵattandyratyn joǵary tiimdi, básekege qabiletti týristik infraqurylymdy qurý, sondai-aq áleýmettik máselelerdi sheshý maqsatynda quryldy.
2027 jyldyń sońyna deiin áýejaidy jańǵyrtý boiynsha aýqymdy jumystar júrgiziledi. Jobanyń birinshi kezeńinde ushý-qoný jolaǵy men perron kúrdeli jóndeýden ótip, qoldanystaǵy terminal jańǵyrtylady jáne jańa VIP-terminal salynady. Al ekinshi kezeńde ekinshi ushý-qoný jolaǵy men keden qoimalarymen jabdyqtalǵan jańa logistikalyq ortalyq – mýltimodaldy tranzittik hab iske qosylady.
Joba aiasynda 720 jańa jumys orny ashylady dep josparlanýda. Sonymen qatar, jolaýshylar aǵyny jylyna 2,5 million adamǵa deiin artady. Áýejai arqyly tasymaldanatyn júk kólemi qazirgi 3 000 tonnadan 100 000 tonnaǵa deiin ulǵaiady. Ekonomikalyq turǵydan alǵanda, Mańǵystaý oblysynyń ishki óńirlik ónimi 12 paiyzǵa ósip, jalpy kólemi 3 trillion teńgege deiin jetedi dep kútilýde.
Joba tolyq júzege asqannan keiin Aqtaý halyqaralyq áýejaiy arqyly keletin ishki jáne halyqaralyq týrister sany jylyna 600 myń adamǵa deiin jetedi dep josparlanyp otyr.
