ق ر ۇكىمەتىنىڭ 2025 جىلعى 14 ناۋرىزداعى قاۋلىسىمەن ەلىمىزدىڭ كەيبىر ارنايى ەكونوميكالىق ايماقتاردىڭ (اەا) قىزمەتىنە وزگەرىستەر مەن تولىقتىرۋلار ەنگىزىلدى. بۇل زاڭناماعا سايكەس اقتاۋ اۋەجايى «اقتاۋ تەڭىز پورتى» اەا قۇرامىنا ەندى، دەپ حابارلايدى Dalanews.kz
جاڭا ەرەجەدە ارنايى ەكونوميكالىق ايماق ماڭعىستاۋ وبلىسىنىڭ اۋماعىندا، اتاپ ايتقاندا، اقتاۋ قالاسى، مۇنايلى، قاراقيا جانە ءتۇپقاراعان اۋداندارىنىڭ اۋماعىندا ورنالاسقان.
بۇل اەا ءوڭىردىڭ جەدەل دامۋىن قامتاماسىز ەتۋ، رەسپۋبليكانىڭ ەكونوميكاسىن الەمدىك شارۋاشىلىق بايلانىستار جۇيەسىنە ەنۋىن جەدەلدەتۋ، جوعارى تەحنولوگيالىق جانە باسەكەگە قابىلەتتى وندىرىستەردى قۇرۋ، جاڭا ءونىم تۇرلەرىن شىعارۋ، ينۆەستيسيا تارتۋ، نارىقتىق قاتىناستاردىڭ قۇقىقتىق نورمالارىن جەتىلدىرۋ، باسقارۋدىڭ زاماناۋي ادىستەرىن جانە شارۋاشىلىق جۇرگىزۋ ادىستەرىن ەنگىزۋ، مۋلتيمودالدى حابتاردى، كولىك پەن لوگيستيكانى دامىتۋ، ءوڭىردىڭ تۋريستىك الەۋەتىن ارتتىرۋ، قازاقستاندىق جانە شەتەلدىك تۋريستەردىڭ قاجەتتىلىكتەرىن قاناعاتتاندىراتىن جوعارى ءتيىمدى، باسەكەگە قابىلەتتى تۋريستىك ينفراقۇرىلىمدى قۇرۋ، سونداي-اق الەۋمەتتىك ماسەلەلەردى شەشۋ ماقساتىندا قۇرىلدى.
2027 جىلدىڭ سوڭىنا دەيىن اۋەجايدى جاڭعىرتۋ بويىنشا اۋقىمدى جۇمىستار جۇرگىزىلەدى. جوبانىڭ ءبىرىنشى كەزەڭىندە ۇشۋ-قونۋ جولاعى مەن پەررون كۇردەلى جوندەۋدەن ءوتىپ، قولدانىستاعى تەرمينال جاڭعىرتىلادى جانە جاڭا VIP-تەرمينال سالىنادى. ال ەكىنشى كەزەڭدە ەكىنشى ۇشۋ-قونۋ جولاعى مەن كەدەن قويمالارىمەن جابدىقتالعان جاڭا لوگيستيكالىق ورتالىق – مۋلتيمودالدى ترانزيتتىك حاب ىسكە قوسىلادى.
جوبا اياسىندا 720 جاڭا جۇمىس ورنى اشىلادى دەپ جوسپارلانۋدا. سونىمەن قاتار، جولاۋشىلار اعىنى جىلىنا 2،5 ميلليون ادامعا دەيىن ارتادى. اۋەجاي ارقىلى تاسىمالداناتىن جۇك كولەمى قازىرگى 3 000 توننادان 100 000 تونناعا دەيىن ۇلعايادى. ەكونوميكالىق تۇرعىدان العاندا، ماڭعىستاۋ وبلىسىنىڭ ىشكى وڭىرلىك ءونىمى 12 پايىزعا ءوسىپ، جالپى كولەمى 3 تريلليون تەڭگەگە دەيىن جەتەدى دەپ كۇتىلۋدە.
جوبا تولىق جۇزەگە اسقاننان كەيىن اقتاۋ حالىقارالىق اۋەجايى ارقىلى كەلەتىن ىشكى جانە حالىقارالىق تۋريستەر سانى جىلىنا 600 مىڭ ادامعا دەيىن جەتەدى دەپ جوسپارلانىپ وتىر.
