Aqsý aýdany ákimdigi habarlanǵandai, biyl oblystyń 11 aýyldyq okrýgindegi 83 sharýa qojalyqtary 3167 gektar jerge qant qyzylshasyn sepken. Óńirde tuqym sebýge arnalǵan tehnikamen tolyq jabdyqtalǵan alty qyzmet satyp alý ortalyǵy men tórt sharýa qojalyǵy qant qyzylshasyna egý jumystarymen ainalysady. Ótken jyly oblysta 2850 gektarǵa qant qyzylshasy egildi. Ortasha ónimdiligi 340 tsentnerden asatyn 97 241 tonna ónim alyndy. Biyl 86 sharýa qojalyqtary 3167 gektar jerge qant qyzylshasyn septi. 126 myń tonnadan astam ónim shyǵarý josparlanýda. Ortasha ónimdiligi 400-600 tsentner.
Aqsý qant zaýytynyń bas direktory Samat Nádirbaevtyń aitýynsha, zaýyttyń qýattylyǵy táýligine tórt myń tonnaǵa eseptelgen.
– Endi biz úshin qyzylshanyń 10 kúndik qoryn jinaý mańyzdy. Zaýyt tolyq qýatynda jumys istei bastaidy. Kúnine 100-120 avtomashina qabyldaimyz, – dedi direktor.
Jalpy, seriktestikti shikizatpen 17 qyzylsha óndirisi boiynsha servistik-daiyndaý ortalyqtary jáne Aqsý, Sarqan jáne Alakól aimaqtaryndaǵy qyzylsha ósiretin 200-den astam usaq sharýashylyqtar qamtamasyz etedi.
Esterińizge sala keteiik, biyl Almaty oblysynda 500 myń tonna tátti túbir jinap, shamamen 42 myń tonna qant óndirý josparlanǵan. Óńdeýdi oblystyń Aqsý jáne Kóksý aýdandaryndaǵy eki qant zaýyty júzege asyrady. Jalpy, biyl oblysta qant qyzylshasynyń egis alqaby 2,1 myń gektarǵa ulǵaitylyp, 16,1 myń gektarǵa jetti.
