اقسۋ قانت زاۋىتى قانت قىزىلشاسىن قابىلداي باستادى. ءتاتتى ءتۇبىردى العاش بولىپ اقسۋ مەن سارقان اۋداندارىنىڭ شارۋا قوجالىقتارى جەتكىزدى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

اقسۋ اۋدانى اكىمدىگى حابارلانعانداي، بيىل وبلىستىڭ 11 اۋىلدىق وكرۋگىندەگى 83 شارۋا قوجالىقتارى 3167 گەكتار جەرگە قانت قىزىلشاسىن سەپكەن. وڭىردە تۇقىم سەبۋگە ارنالعان تەحنيكامەن تولىق جابدىقتالعان التى قىزمەت ساتىپ الۋ ورتالىعى مەن ءتورت شارۋا قوجالىعى قانت قىزىلشاسىنا ەگۋ جۇمىستارىمەن اينالىسادى. وتكەن جىلى وبلىستا 2850 گەكتارعا قانت قىزىلشاسى ەگىلدى. ورتاشا ونىمدىلىگى 340 سەنتنەردەن اساتىن 97 241 توننا ءونىم الىندى. بيىل 86 شارۋا قوجالىقتارى 3167 گەكتار جەرگە قانت قىزىلشاسىن سەپتى. 126 مىڭ توننادان استام ءونىم شىعارۋ جوسپارلانۋدا. ورتاشا ونىمدىلىگى 400-600 سەنتنەر.

اقسۋ قانت زاۋىتىنىڭ باس ديرەكتورى سامات نادىربايەۆتىڭ ايتۋىنشا، زاۋىتتىڭ قۋاتتىلىعى تاۋلىگىنە ءتورت مىڭ تونناعا ەسەپتەلگەن.

– ەندى ءبىز ءۇشىن قىزىلشانىڭ 10 كۇندىك قورىن جيناۋ ماڭىزدى. زاۋىت تولىق قۋاتىندا جۇمىس ىستەي باستايدى. كۇنىنە 100-120 اۆتوماشينا قابىلدايمىز، – دەدى ديرەكتور.

ايتا كەتۋ كەرەك، بۇگىندە اقسۋ قانت زاۋىتى قانت قىزىلشاسىن قابىلداۋعا 100 پايىز دايىن. ءقازىر كاسىپورىندا 240 ادام جۇمىس ىستەيدى. ءوندىرىس باستالعان كەزدە جۇمىس ورىندارىنىڭ سانى 550-گە دەيىن جەتەدى. سونىمەن بىرگە تەحنولوگيالىق پروسەستەردى جەتىلدىرۋ بويىنشا قاجەتتى جۇمىستاردى جۇرگىزۋگە ۋكراينادان تەحنولوگتار مەن ماماندار شاقىرىلدى.

جالپى، سەرىكتەستىكتى شيكىزاتپەن 17 قىزىلشا ءوندىرىسى بويىنشا سەرۆيستىك-دايىنداۋ ورتالىقتارى جانە اقسۋ، سارقان جانە الاكول ايماقتارىنداعى قىزىلشا وسىرەتىن 200-دەن استام ۇساق شارۋاشىلىقتار قامتاماسىز ەتەدى.

ەستەرىڭىزگە سالا كەتەيىك، بيىل الماتى وبلىسىندا 500 مىڭ توننا ءتاتتى ءتۇبىر جيناپ، شامامەن 42 مىڭ توننا قانت ءوندىرۋ جوسپارلانعان. وڭدەۋدى وبلىستىڭ اقسۋ جانە كوكسۋ اۋداندارىنداعى ەكى قانت زاۋىتى جۇزەگە اسىرادى. جالپى، بيىل وبلىستا قانت قىزىلشاسىنىڭ ەگىس القابى 2،1 مىڭ گەكتارعا ۇلعايتىلىپ، 16،1 مىڭ گەكتارعا جەتتى.