Jetisý oblysynda toǵyzynshy «Januia» otbasyn qoldaý ortalyǵy ashyldy. Bul áleýmettik mańyzy bar nysan Aqsý aýdanynda da óz jumysyn bastady, dep habarlaidy Dalanews.kz
Oblystyq jumyspen qamtýdy úilestirý jáne áleýmettik baǵdarlamalar basqarmasynyń habarlaýynsha, ómirlik qiyn jaǵdaiǵa tap bolǵan otbasylardy anyqtaý jáne qoldaý maqsatynda qurylǵan «Januia» ortalyqtary Jetisý óńiriniń aýdandary men qalalarynda 2023 jyldan bastap ashyla bastady. Olardyń jumysy qiyn ómirlik jaǵdaiǵa tap bolǵan turǵyndarǵa tegin quqyqtyq, psihologiialyq jáne áleýmettik kómek, daǵdarysqa ushyraǵan otbasylarǵa qoldaý kórsetýge baǵyttalǵan. Ortalyqqa júgingenderge bilikti zańgerler, psihologtar, áleýmettik qyzmetkerler kómek kórsetedi.
– Biz bul ortalyqtardy adamdardyń igiligi, otbasymyzdyń bolashaǵy úshin ashyp jatyrmyz. Munda kelýshiler memleketten qoldaý taba alady. Bizdiń maqsatymyz – qoldaýǵa zárý jandarǵa keńes berý ǵana emes, naqty kómek kórsetý, jumysqa ornalastyrý, quqyq qorǵaý, psihologiialyq qoldaý kórsetý, – dedi Jetisý oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Ermek Mizambaev.
Jergilikti turǵyndar da jańa ortalyqtyń mańyzdylyǵyna senim bildirdi. Jansúgirov aýylynyń turǵyny, kóp balaly ana Mariiam Dúisenbina ortalyqtyń ashylǵanyna dán riza.
– Árbir otbasynyń birden mamandarǵa habarlasý múmkindigi bola bermeidi. Biraq qazir kez kelgen kezde kómek ala alamyz. Eń bastysy – tegin. Ortalyq kópshilik úshin shynaiy tirekke ainaldy. Munda kelgen ár adam ómirindegi qiyn kezeńde qoldaý men túsinistik taba alady dep oilaimyn, – dedi ol.
Aita keteiik, biyl Jetisý oblysynyń Eskeldi jáne Kóksý aýdandarynda, endi Aqsý aýdanynda «Januia» otbasyn qoldaý ortalyqtary ashyldy. Bul ortalyqtar qazir oblystaǵy toǵyz qala men aýdandy qamtysa, kelesi jyly Taldyqorǵan qalasynda ashylady.
Jyl basynan beri oblystyq «Januia» otbasyn qoldaý ortalyqtaryna 212 otbasynan 570-ten astam adam tirkelip, jan-jaqty psihologiialyq, áleýmettik jáne qoldaý qyzmetterin alýda.
