جەتىسۋ وبلىسىندا توعىزىنشى «جانۇيا» وتباسىن قولداۋ ورتالىعى اشىلدى. بۇل الەۋمەتتىك ماڭىزى بار نىسان اقسۋ اۋدانىندا دا ءوز جۇمىسىن باستادى، دەپ حابارلايدى Dalanews.kz
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ حابارلاۋىنشا، ومىرلىك قيىن جاعدايعا تاپ بولعان وتباسىلاردى انىقتاۋ جانە قولداۋ ماقساتىندا قۇرىلعان «جانۇيا» ورتالىقتارى جەتىسۋ ءوڭىرىنىڭ اۋداندارى مەن قالالارىندا 2023 جىلدان باستاپ اشىلا باستادى. ولاردىڭ جۇمىسى قيىن ومىرلىك جاعدايعا تاپ بولعان تۇرعىندارعا تەگىن قۇقىقتىق، پسيحولوگيالىق جانە الەۋمەتتىك كومەك، داعدارىسقا ۇشىراعان وتباسىلارعا قولداۋ كورسەتۋگە باعىتتالعان. ورتالىققا جۇگىنگەندەرگە بىلىكتى زاڭگەرلەر، پسيحولوگتار، الەۋمەتتىك قىزمەتكەرلەر كومەك كورسەتەدى.
– ءبىز بۇل ورتالىقتاردى ادامداردىڭ يگىلىگى، وتباسىمىزدىڭ بولاشاعى ءۇشىن اشىپ جاتىرمىز. مۇندا كەلۋشىلەر مەملەكەتتەن قولداۋ تابا الادى. ءبىزدىڭ ماقساتىمىز – قولداۋعا ءزارۋ جاندارعا كەڭەس بەرۋ عانا ەمەس، ناقتى كومەك كورسەتۋ، جۇمىسقا ورنالاستىرۋ، قۇقىق قورعاۋ، پسيحولوگيالىق قولداۋ كورسەتۋ، – دەدى جەتىسۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامبايەۆ.
جەرگىلىكتى تۇرعىندار دا جاڭا ورتالىقتىڭ ماڭىزدىلىعىنا سەنىم ءبىلدىردى. جانسۇگىروۆ اۋىلىنىڭ تۇرعىنى، كوپ بالالى انا ماريام دۇيسەنبينا ورتالىقتىڭ اشىلعانىنا ءدان ريزا.
– ءاربىر وتباسىنىڭ بىردەن ماماندارعا حابارلاسۋ مۇمكىندىگى بولا بەرمەيدى. ءبىراق ءقازىر كەز كەلگەن كەزدە كومەك الا الامىز. ەڭ باستىسى – تەگىن. ورتالىق كوپشىلىك ءۇشىن شىنايى تىرەككە اينالدى. مۇندا كەلگەن ءار ادام ومىرىندەگى قيىن كەزەڭدە قولداۋ مەن تۇسىنىستىك تابا الادى دەپ ويلايمىن، – دەدى ول.
ايتا كەتەيىك، بيىل جەتىسۋ وبلىسىنىڭ ەسكەلدى جانە كوكسۋ اۋداندارىندا، ەندى اقسۋ اۋدانىندا «جانۇيا» وتباسىن قولداۋ ورتالىقتارى اشىلدى. بۇل ورتالىقتار ءقازىر وبلىستاعى توعىز قالا مەن اۋداندى قامتىسا، كەلەسى جىلى تالدىقورعان قالاسىندا اشىلادى.
جىل باسىنان بەرى وبلىستىق «جانۇيا» وتباسىن قولداۋ ورتالىقتارىنا 212 وتباسىنان 570-تەن استام ادام تىركەلىپ، جان-جاقتى پسيحولوگيالىق، الەۋمەتتىك جانە قولداۋ قىزمەتتەرىن الۋدا.
