Májilis depýtaty Jarqynbek Amantaiuly treningterge qatysty dabyl qaqty, dep habarlaidy Dalanews.kz.
Depýtat premer-ministrdiń orynbasary - mádeniet jáne aqparat ministri Aida Balaevaǵa, Bas prokýror Berik Asylovqa depýtattyq saýal joldady.
"Jarnamasy jańǵyryp turǵan treningter azamattarymyzǵa paida emes, kerisinshe rýhani, psihologiialyq jáne qarjylyq ziian keltirip otyr. Mysal keltireiin. vybor.kz internet platformasy arqyly óz qyzmetin belsendi túrde nasihattaityn MINDFULNESS oqý ortalyǵy úsh satyly trening usynady. Birinshi jalpy kýrs - 50 000 myń teńge. Ekinshi transformatsiialyq kýrs - 95 000 myń teńge. Úshinshi kóshbasshylyqty damytý kýrsy - 150 000 myń teńge. Onlain formattaǵy "emotsionaldyq erkindik" kýrsynyń quny 200 000 myń teńgege jetedi. Osyndai "kreativti oilaýdy", "tiimdi kommýnikatsiiany", "sheshen sóileýdi" tegin úiretemiz dep ýáde beretin ortalyqtar da az emes. Olardyń qatarynda sheteldik "Vektor", "Lider-motivator" sekildi ataýmen jumys isteitin ortalyqtar bar", - dedi Amantaiuly.
Jarqynbek Amantaiulynyń sózinshe, barlyǵynyń jumys isteý ádisi bir.
"Tańerteń qatysýshylardyń telefondaryn jinap alady. Odan keiin psihologiialyq jáne moraldyq qysymǵa negizdelgen "aqyl-keńester" arqyly adamnyń jeke keńistigine qol suǵyp, sanasyn birtindep ýlaidy. Sodan keiin ne bolady? Árine, óziniń talap-mindetterin ońai oryndata bastaidy. Adamdy kópshilik aldynda jeke problemasyn ashyq aitýǵa májbúrleidi. Biri jylaidy, biri aiqailaidy, biri kúledi, biri bileidi. Tipti keibirine edendi tilimen jalaý, bir-biriniń túkirigin ishkizý siiaqty aitýǵa aýyz barmas soraqy áreketter jasatady. Ekinshi kýrsta jaǵdai odan ári ýshyǵady. Qatysýshylarǵa áleýmettik rólin ózgertý mindetteledi: er adamǵa áiel kiimin kiip, kóshede júrý tapsyrylýy múmkin nemese "bomj" keipine ózgerip, qoqys mańynda tamaq jeý talap etiledi. Osylaisha bul treningter adam sanasyn tájiribe alańyna ainaldyrady. Al kýrs aiaqtalǵan soń qysymnyń jańa túri bastalady. Qatysýshyǵa mindetti túrde úsh adamdy kýrsqa tartý talaby qoiylady. Oryndai almasa taǵy da qorqytý, psihologiialyq qysym, áýelde ózi áshkerelegen qylmystary men aiyptaryn jariialaý, jobadan shyǵaramyz degen syndy úrei týǵyzady", - dedi ol.
