23 qańtarda Ulttyq bank 2026 jylǵy alǵashqy sheshimin jariialaidy jáne naryqta bazalyq mólsherleme 18% deńgeiinde saqtalady degen boljam basym, dep habarlaidy Dalanews.kz.
Sarapshylardyń aitýynsha, retteýshi organnyń mundai ustanymyna infliatsiianyń áli de joǵary bolýy áser etip otyr. Byltyr baǵa ósimi 12 paiyzdan asty, bul belgilengen mejeden eki eseden kóp. Mundai jaǵdaida aqsha saiasatyn jumsartý táýekeldi qadam sanalady.
Aldaǵy ailarda infliatsiialyq qysym kúsheiýi múmkin. Naýryzdan keiin kommýnaldyq tarifterdiń qaita ósýi kútiledi. Sonymen qatar janarmai baǵasynyń birtindep qymbattaýy yqtimal. Bul halyqtyń baǵaǵa qatysty synyn arttyryp, naryqtaǵy turaqtylyqqa áser etedi.
Ulttyq bank basshylyǵy mólsherlemeni tómendetý tek infliatsiia báseńdep, táýekelder azaiǵan kezde ǵana múmkin bolatynyn buǵan deiin de málimdegen. Sondyqtan aqsha saiasatyn jumsartý máselesi kem degende jyldyń ekinshi jartysyna deiin keiinge qalýy yqtimal.
Sarapshylardyń aitýynsha, bazalyq mólsherlemeni tómendetý úshin birneshe shart oryndalýy kerek:
1.infliatsiia men baǵa kútýi tómendeýi;
2.tutynýshylyq nesieleý baiaýlaýy;
3.tarifterdi ósirý protsesi baqylaýda ótýi;
4.makroekonomikany turaqtandyrý baǵdarlamasy naqty iske qosylýy.
Osy jaǵdailardy eskersek, Ulttyq bank aldaǵy otyrysta bazalyq mólsherlemeni 18% deńgeiinde qaldyrýy yqtimal.
