Almatyda qoǵamdyq tártipti buzǵan jasóspirimder anyqtaldy, dep habarlaidy Dalanews.kz.
Tekseris júrgizýge áleýmettik jelilerde taralǵan beinematerialdar negiz bolǵan. Onda bir top jasóspirimniń azamattarǵa agressivti ári ádepsiz áreketi beinelengen.
Bul derekter boiynsha Medeý jáne Almaly aýdandarynyń politsiia basqarmalary tarapynan tekseris júrgizilip, kámeletke tolmaǵandar anyqtalyp, aýmaqtyq politsiia bólimshelerine jetkizilgen.
"Jasóspirimder - Tájikstan Respýblikasynyń azamattary. Olar Kámeletke tolmaǵandardy beiimdeý ortalyǵyna ornalastyrylyp, olarmen profilaktikalyq jumystar júrgizilip jatyr.
Tekseris nátijeleri boiynsha olardyń zańdy ókilderi balalardy tárbieleý jónindegi mindetin tiisinshe oryndamaǵany úshin ákimshilik jaýapkershilikke tartyldy. Sonymen qatar, olarǵa qatysty Qazaqstan Respýblikasynyń kóshi-qon zańnamasy sheńberinde el aýmaǵynan shyǵarý sharalary qabyldanyp jatyr", - dep jazylǵan habarlamada.
Qazir árbir derek boiynsha tekseris jalǵasyp jatyr.
Aita keteiik, buǵan deiin áleýmettik jelide daý týǵyzatyn video tarady. Videoda kishkentai qyzdar saiabaqtaǵy adamdarǵa tiiskeni, aqsha surap, bermese, zattaryn tartyp alǵany aityldy.
