QMA Shymkent qalasy boiynsha departamenti zańsyz oiyn biznesimen ainalysqan qylmystyq toptyń qyzmetin toqtatty, dep habarlaidy Dalanews.kz.
Shymkent turǵyny mobildi qosymsha arqyly jumys istegen jasyryn internet kazino uiymdastyryp, onyń jumysyn úilestirgen. Qylmystyq shemany iske asyrý úshin poker oinaýǵa arnalǵan ("Tehas holdem") mobildi qosymsha paidalanylǵan. Onda Vendetta jáne AMG600L atty oiyn klýbtary qurylyp, olar Nomad jelisine biriktirilgen. Bul klýbtar táýlik boiy jumys istep, Qazaqstannan bólek, Ózbekstan men Qyrǵyzstan siiaqty elderdiń oiynshylaryn da tartqan.
"Klient sanyn kóbeitý úshin messendjerler arqyly maqsatty habarlamalar jiberilip, túrli bonýstar men yntalandyrý júiesi qoldanylǵan. Oiynshylar óz esepshotyn bank shottaryna aqsha aýdarý arqyly toltyryp, sonyń negizinde oiynǵa qatysýǵa múmkindik beretin "fishkalar" alǵan. Utqan jaǵdaida qarajat qolma-qol aqshaǵa ainaldyrylyp, paidalanýshylardyń kartalaryna aýdarylyp otyrǵan. Uiymdastyrýshylardyń tabysy ár oiyn ústelinen alynatyn 3-5% kólemindegi komissiia ("reik") esebinen qalyptasyp, turaqty kiris ákelip otyrǵan. Sonymen qatar, oiynshylardy ustap qalý úshin olarǵa virtýaldy qarajatty qaryzǵa berý tájiribesi de qoldanylǵan. Qarjyny jasyrý maqsatynda dropperlerdiń bank shottary, sonyń ishinde shetel azamattarynyń shottary paidalanylǵan. Shotyn bergeni úshin árbir esepshotqa 100-200 myń teńge kóleminde syiaqy tólengen", - dep jazylǵan habarlamada.
Bul shottar boiynsha jalpy aqsha ainalymy 557 mln teńgeden asqan. Sondai-aq, tintý barysynda uiymdastyrýshynyń turǵylyqty jerinen esirtki tárkilendi. Eki kúdiktige úiqamaq túrindegi bultartpaý sharasy qoldanyldy. Qylmystyq is sotqa joldandy.
