شىمكەنت تۇرعىنى ءموبيلدى قوسىمشا ارقىلى جۇمىس ىستەگەن جاسىرىن ينتەرنەت كازينو ۇيىمداستىرىپ، ونىڭ جۇمىسىن ۇيلەستىرگەن. قىلمىستىق سحەمانى ىسكە اسىرۋ ءۇشىن پوكەر ويناۋعا ارنالعان ("تەحاس حولدەم") ءموبيلدى قوسىمشا پايدالانىلعان. وندا Vendetta جانە AMG600L اتتى ويىن كلۋبتارى قۇرىلىپ، ولار Nomad جەلىسىنە بىرىكتىرىلگەن. بۇل كلۋبتار تاۋلىك بويى جۇمىس ىستەپ، قازاقستاننان بولەك، وزبەكستان مەن قىرعىزستان سياقتى ەلدەردىڭ ويىنشىلارىن دا تارتقان.

"كليەنت سانىن كوبەيتۋ ءۇشىن مەسسەندجەرلەر ارقىلى ماقساتتى حابارلامالار جىبەرىلىپ، ءتۇرلى بونۋستار مەن ىنتالاندىرۋ جۇيەسى قولدانىلعان. ويىنشىلار ءوز ەسەپشوتىن بانك شوتتارىنا اقشا اۋدارۋ ارقىلى تولتىرىپ، سونىڭ نەگىزىندە ويىنعا قاتىسۋعا مۇمكىندىك بەرەتىن "فيشكالار" العان. ۇتقان جاعدايدا قاراجات قولما-قول اقشاعا اينالدىرىلىپ، پايدالانۋشىلاردىڭ كارتالارىنا اۋدارىلىپ وتىرعان. ۇيىمداستىرۋشىلاردىڭ تابىسى ءار ويىن ۇستەلىنەن الىناتىن 3-5% كولەمىندەگى كوميسسيا ("رەيك") ەسەبىنەن قالىپتاسىپ، تۇراقتى كىرىس اكەلىپ وتىرعان. سونىمەن قاتار، ويىنشىلاردى ۇستاپ قالۋ ءۇشىن ولارعا ۆيرتۋالدى قاراجاتتى قارىزعا بەرۋ تاجىريبەسى دە قولدانىلعان. قارجىنى جاسىرۋ ماقساتىندا دروپپەرلەردىڭ بانك شوتتارى، سونىڭ ىشىندە شەتەل ازاماتتارىنىڭ شوتتارى پايدالانىلعان. شوتىن بەرگەنى ءۇشىن ءاربىر ەسەپشوتقا 100-200 مىڭ تەڭگە كولەمىندە سىياقى تولەنگەن"، - دەپ جازىلعان حابارلامادا.

بۇل شوتتار بويىنشا جالپى اقشا اينالىمى 557 ملن تەڭگەدەن اسقان. سونداي-اق، ءتىنتۋ بارىسىندا ۇيىمداستىرۋشىنىڭ تۇرعىلىقتى جەرىنەن ەسىرتكى تاركىلەندى. ەكى كۇدىكتىگە ءۇيقاماق تۇرىندەگى بۇلتارتپاۋ شاراسى قولدانىلدى. قىلمىستىق ءىس سوتقا جولداندى.