Qazaqstanda jaqynda ártúrli bankter arasynda telefon nómiri arqyly aqsha aýdarymdary iske qosylady. Bul týraly Ulttyq bank tóraǵasynyń orynbasary Berik Sholpanqulov málimdedi. Qazir Ulttyq tólem korporatsiiasy bankterdi jańa júiege kezeń-kezeńimen qosyp jatyr, dep habarlaidy Dalanews.kz.
«Toǵyz bankpen kelisimshartqa qol qoiyldy. Olar – "Halyq banki", "Bank TsentrKredit", Freedom Bank, Altyn Bank, RBK, Bereke, Forte, Home Credit Bank jáne "Nurbank". Kelisimshartqa qol qoiý – bankterdiń tehnikalyq qosylý men júie jasaýdy bastaǵanyn bildiredi», – dedi Sholpanqulov.
Onyń aitýynsha, alǵashqy bes bank klientteri úshin telefon nómiri arqyly aýdarym jasaý qyzmeti maýsym aiynda iske qosylady. Bul bankter: Halyq banki, Freedom Bank, Altyn Bank, RBK jáne Home Credit Bank. Qalǵan bankter júiege kezeń-kezeńimen qosylady.
Sholpanqulov jańalyqtyń máni tek telefon nómiri arqyly aqsha aýdarýdyń yńǵailylyǵynda emes, QR-kod arqyly aralyq banktik esep aiyrysý engiziletinin atap ótti.
«Byltyr biz osyndai júie jasadyq, qazir bankterdi qosý jalǵasýda. Bul – tehnologiialyq protsess, bári bankterdiń tehnikalyq daiyndyǵyna bailanysty. Keibir bankterdiń IT-infraqurylymy kúrdeli, sondyqtan ýaqyt sozylyp jatyr. Biraq biz bul júieni jyl sońyna deiin tolyq engizýdi kózdep otyrmyz», – dedi Sholpanqulov.
Onyń aitýynsha, biryńǵai QR-kodty qoldaný banktik qosymshalar siiaqty yńǵaily bolady.
«Bul – sizdiń kádimgi mobildi banktik qosymshańyz. Mysaly, siz A bankiniń klientisiz, dúkenge bardyńyz delik. Ol jerde basqa bank – V bankiniń terminaly tur. Siz óz bankińizdiń qosymshasynan QR-kodty skanerlep, tólem jasai alasyz», – dep túsindirdi ol.
Qazir QR arqyly tólem jasaý tek bir bank ishindegi ekojúiede ǵana múmkin. Jańa júie tutynýshylar úshin áldeqaida ikemdi bolady.
«Sizge yńǵailysy – qai banktiń klienti bolsańyz da, kez kelgen terminal arqyly tólem jasai alasyz», – dedi ol.
Tarifter týraly aita kele, Ulttyq bank tóraǵasynyń orynbasary komissiia máselesi – naryqtyq mehanizm ekenin aitty.
«Tarifter, tegin qyzmet jáne taǵy basqa máseleler – bul naryqtyq qubylys. Bankter men tólem júieleri kórsetetin qyzmetter qymbat serverler men infraqurylymdy ustaýǵa baǵyttalǵan. Sondyqtan biz bul komissiia mólsherine tikelei aralaspaimyz», – dep túsindirdi ol.
Soǵan qaramastan, Ulttyq bankte arnaiy tariftik keńes qurylǵan. Onda banktermen tólem qoljetimdiligi talqylanady. Sholpanqulovtyń aitýynsha, komissiiany azaitý boiynsha júieli jumys júrgizilýde.
«Bankterge qatysty komissiia máselesinde júieli jumys júrip jatyr. Kásipkerler úshin komissiia negizinen eki bólikten turady: intercheindj mólsherlemesi jáne bank komissiiasy. Intercheindj – bul Ulttyq bank pen halyqaralyq tólem júieleri arasyndaǵy qyzmetke qatysty mólsherleme. Bul kórsetkish qazir tómendedi», – dedi ol.
Ulttyq bank ókiliniń aitýynsha, básekelestik nátijesinde naryqtaǵy komissiialar tómendep keledi.
«Komissiialar básekeniń arqasynda tómendeidi. Biryńǵai QR-kod júiesi de osy tendentsiiaǵa sáikes bolady. Biraq bul QR-kod arqyly tólem mindetti túrde tegin bolady degen sóz emes. Bul másele áli talqylanyp jatyr. Degenmen, tutynýshylar úshin ol qazirgi siiaqty tegin bolyp qala beredi», – dep túiindedi Berik Sholpanqulov.
