Aleksandrıa qalasynda (AQSH, Vırdjınıa shtaty) ótken 2025 jylǵy mektep komandalary arasyndaǵy shahmattan Álem chempıonatynda RFMM (Almaty) quramasy kúmis júldege ıe boldy. Jeke esepte de oqýshylar jarqyn óner kórsetti: Imanǵalı Aqylbaı altyn medal jeńip alsa, Edgar Mamedov pen Zarına Nurǵalıeva qola medal ıegerleri atandy.
FIDE World Schools Team Championship 2025 aıasynda ótken bul dodaǵa 48 elden 55 komanda qatysty. Aqtaýda ótken eki jyl burynǵy chempıonattan aıyrmashylyǵy – Aleksandrıada jas erekshelikteri boıynsha bólinis bolmady. Al quramda qyzdar men 12 jastaǵy sportshylardyń bolýy endi mindet emes, sporttyq irikteý nátıjesi retinde baǵalandy.
Týrnırdiń sońǵy kúni ádettegiden erte – jergilikti ýaqyt boıynsha saǵat 10:00-de (Qazaqstan ýaqytymen 19:00-de) bastaldy. 7-shi týrdyń basty ıntrıgasy: Danıs Qýandyquly (2156) men onyń SEED Educational Complex (Astana) komandasy Úndistannyń Velammal MHS School (Chennaı) komandasyn toqtata ala ma? Ókinishke qaraı, esep ½–3½ esebimen úndilik komandanyń paıdasyna aıaqtaldy, degenmen Danıs qarsy komandanyń kóshbasshysy S.Asvatpen (2369) teń oıyn kórsetti.
Al qalǵan eki qazaqstandyq komanda jeńiske jetti: RFMM (Almaty) komandasy Wellington College (Jańa Zelandıa) komandasyn 4–0 esebimen oısyrata jeńse, RFMM-2 (Astana) komandasy Gymnázium, Grösslingová 18 (Bratıslava, Slovakıa) komandasyn 2½–1½ esebimen tize búktirdi. Sonymen qatar úzdikter arasyndaǵy úsh birdeı mach teń aıaqtaldy – 2–2: The Harker School (San-Hose, AQSH) – Royal College (Kolombo, Shrı-Lanka), University High School (Irvın, AQSH) – Wisdom (Tashkent, Ózbekstan), jáne Kantonsschule Alpenquai (Lúsern, Shveısarıa) – Lyceum «Photon» (Gúmrı, Armenıa).
Osylaısha, týrnır aıaqtalýǵa bir týr qalǵanda álem chempıony belgili boldy – Velammal MHS School (Chennaı, Úndistan) komandasy! Olar 14 komandalyq upaı jınady, bul nátıjege eshbir qarsylas jete almady. Al ekinshi oryn úshin kúres qyzý ótti: 11 upaımen úsh komanda – Royal College, The Harker School jáne Wisdom – júldege úmit artty. Olardyń izin ala 10 upaımen tórt komanda – RFMM (Almaty), SEED Educational Complex (Astana), RFMM-2 (Astana) jáne Istanbul Erkek High School (Túrkıa) kele jatty.
8-shi týrda sheshýshi machtar ótti: Velammal MHS School – Wisdom, The Harker School – SEED Educational Complex, Royal College – RFMM-2 jáne Istanbul Erkek High School – RFMM kezdesýleri júldeli oryndardyń taǵdyryn anyqtady.
Chempıondyqty erterek qamtamasyz etken úndilik komanda kórshiles Ózbekstannyń Wisdom komandasyn zorǵa degende 2½–1½ esebimen jeńdi. Sol kezde astanalyq RFMM-2 Shrı-Lanka ókilderin dál sondaı eseppen tize búktirdi. Al almatylyq komanda túrkıalyq oqýshylardy 4–0 esebimen oısyrata utty. Osy nátıjelerden keıin barsha nazar The Harker School men SEED Educational Complex arasyndaǵy kezdesýge aýdy. Eger AQSH komandasy jeńse – olarda kúmis medal, al Qazaqstan úshin 3-shi oryn ǵana qalady. Eger bizdiń komanda jeńse – alǵashqy úsh oryndy qazaqstandyqtar bólisedi: 2-shi oryn – RFMM (Almaty), 3-shi oryn – SEED Educational Complex, 4-shi oryn – RFMM-2 (Astana). Alaıda kezdesý teń aıaqtaldy – 2–2...
Qorytyndy komandalyq keste kelesideı boldy:
- Velammal MHS School (Chennaı, Úndistan) – 16 komandalyq upaı, Zonneborn–Berger koefısıenti: 242,5, jeke upaılar: 26½
- RFMM (Almaty) – 12 upaı, 254, 27;
- The Harker School (San-Hose, AQSH) – 12 upaı, 174,5, 20
- RFMM-2 (Astana) – 12 upaı, 139, 19;
- University High School (Irvın, AQSH) – 11 upaı, 180, 22;
- Royal College (Kolombo, Shrı-Lanka) – 11 upaı, 177, 20½;
- Lyceum «Photon» (Gúmrı, Armenıa) – 11 upaı, 168,5, 22;
- SEED Educational Complex (Astana) – 11 upaı, 158,5, 19½;
- RFMM-1 (Astana) – 8 upaı, 108,5, 16½;
- D.A. Qonaev atyndaǵy mektep-gımnazıasy (Aqtóbe) – 7 upaı, 97, 15;
- O.A. Joldasbekov atyndaǵy №9 IT-lıseı (Shymkent) – 6 upaı, 87, 13.
2025 jylǵy mektep komandalary arasyndaǵy álem chempıony ataǵyn Velammal MHS School (Chennaı, Úndistan) jeńip aldy. Komanda músheleri taqta reti boıynsha: WFM Kırtı Shrı Reddı (rapıd reıtıń – 1910/klasıka – 2033), IM S. Asvat (2369 / 2500), FM Daakshın Arýn (2021/2274), IM A.R. Ilamparthı (2358/2515) jáne FM K.P. Pranav (2090/2276). Kapıtany – 56 jastaǵy Velavan Sýbbıa.
Kúmis júldeger RFMM (Almaty) komandasyn quttyqtaımyz: GM Edgar Mamedov (2299/2490), FM Imanǵalı Aqylbaı (2292/2357), WIM Zarına Nurǵalıeva (2152/2345), CM Álıhan Dáýlet (2173/2158), Ádijan Esenǵalı (1989/2071). Komanda kapıtany – 52 jastaǵy Saıat Egenberdıev.
Júldeli orynǵa bir qadam jetpeı qalǵan RFMM-2 (Astana) komandasyna FM Erǵalı Súleımenniń (2337) kóshbasshylyǵy jetkiliksiz boldy. Quramda: Islam Aıten (2045), Vladımır Savıskıı (1977), Ernur Ahmedıar (1802), Madına Momyn (1792), Dúkembaeva Kamıla (1434). Kapıtany – Botakóz Jolǵasbaeva.
SEED Educational Complex (Astana) komandasy da WFM Marıa Holávkonyń (1987) qatysýynsyz álsirep qaldy. Quramda: CM Danıs Qýandyquly (2156), Aldıar Saılaýbaı (2011), Arsen Aıtmuhanov (1762), Aılın Zarkym (1905). Kapıtany – Qýanysh Súleımen.
Komandalyq kúmispen qatar, jekelegen taqtalarda da úsh medal jeńip alyndy: Imanǵalı Aqylbaı 2-shi taqtada absolútti nátıje – 8 upaıdyń 8-in jınap, altyn medalǵa ıe boldy. Edgar Mamedov pen Zarına Nurǵalıeva 8 partıada 6½ upaı jınap, sáıkesinshe 1 jáne 3-shi taqtalarda qola medal ıelendi.
12 jasar shahmatshylardan quralǵan úsh qazaqstandyq komandanyń óneri jaıynda aıtsaq, olar álemniń myqty qarsylastarymen oınap, qundy tájirıbe jınady.
Halyqaralyq mektep shahmat federasıasynyń (ISCF) jáne KazChess/Qazaqstan shahmat federasıasynyń prezıdenti Tımýr Týrlov jarys qorytyndysyna pikir bildirdi: «Qazaqstan úshin bul týrnır tek sporttyq doda ǵana emes, búkil shahmat qozǵalysyn damytý quraly retinde mańyzdy. Biz jaı ǵana qatysqan joqpyz – onyń uıymdastyrylýyna eleýli úles qostyq. Sondyqtan jarystyń joǵary deńgeıde ótkenine óte qýanyshtymyz. Bizdiń jas shahmatshylar úshin bul – baǵa jetpes tájirıbe, al elimiz úshin – mektepterdegi júıeli jumystyń nátıjesin kórsetetin aıqyn dálel. Barlyq medaldar – úlken eńbektiń, tabandylyqtyń jáne naǵyz komandalyq rýhtyń jemisi. Qazaqstannyń AQSH-taǵy Elshiligine jáne jeke Elshi Erjan Ashyqbaevqa delegasıamyzǵa qoldaý bildirgeni jáne shahmattyń damýyna kóńil bólgeni úshin alǵys aıtamyz. Barlyq qatysýshylar men bapkerlerdi quttyqtaımyn: biz sizdermen maqtanamyz jáne odan da bıik maqsattarǵa birge betteımiz!»
Aıta ketý kerek, Qazaqstan Respýblıkasynyń AQSH-taǵy Elshisi Erjan Ashyqbaev chempıonattyń saltanatty ashylý rásimine ǵana qatysyp qoımaı, búkil týrnır barysynda bizdiń jas sportshylarymyzǵa jankúıerlik tanytyp, erekshe qoldaý bildirdi.
