AQSh biligi Qytaidyń taǵy 43 kompaniiasyn ónimderin el aýmaǵyna importtaýǵa tyiym salynǵan uiymdar tizimine engizdi. Vashingtonnyń málimetinshe, bul kásiporyndar Shyńjań-Uiǵyr avtonomiialyq aýdanynda májbúrli eńbekke qatysy bolýy múmkin degen kúdikke ilingen, dep habarlaidy dalanews.kz.
Sanktsiialyq tizimge taý-ken óndirisi, aýyl sharýashylyǵy, kólik, metallýrgiia jáne teńiz ónimderin óńdeý salasynda jumys isteitin qytailyq kompaniialar endi. Jańa shekteýler 31 shildeden bastap kúshine endi. Osy ózgeristen keiin AQSh-tyń qara tizimindegi qytailyq kompaniialardyń jalpy sany 187-ge jetti.
Bul sharalar 2021 jyldyń sońynda qabyldanǵan Uyghur Forced Labor Prevention Act («Uiǵyrlardy májbúrlep jumysqa jegýdiń aldyn alý týraly» zań) aiasynda júzege asyrylyp otyr. Atalǵan zańǵa sáikes, Shyńjańnan jetkizilgen kez kelgen ónim onyń májbúrli eńbekpen óndirilmegeni dáleldenbeiinshe, zańsyz eńbek nátijesi retinde qarastyrylady.
AQSh biligi Qytaidy uiǵyrlar men basqa da musylman azshylyqtardyń quqyqtaryn júieli túrde buzdy dep aiyptap keledi. Óz kezeginde Qytai bul málimdemelerdi saiasi astary bar aiyptaýlar dep baǵalap, Shyńjańdaǵy saiasaty ekstremizmmen kúresýge jáne óńirdiń áleýmettik-ekonomikalyq damýyn qamtamasyz etýge baǵyttalǵanyn alǵa tartady.
