AQSh pen Iran arasyndaǵy áskeri is-qimyldardyń qaita jandanýyna qaramastan, álemdik munai baǵasy tómendeýin jalǵastyryp jatyr, dep habarlaidy dalanews.kz.
Sońǵy táýlikte Brent markaly munaidyń baǵasy 1,4%-ǵa tómendep, bir barreli shamamen 88 dollarǵa tústi. Al amerikalyq WTI munaiy da 1,4%-ǵa arzandap, 82 dollar deńgeiine deiin tómendegen.
Naryq nege sabyr saqtap otyr?
Deutsche Bank sarapshylarynyń pikirinshe, munai baǵasynyń kúrt qymbattamaýyna birneshe faktor áser etip otyr.
«Ormýz buǵazy arqyly keme qatynasy qiyndaǵanymen, tolyq toqtaǵan joq. Sonymen qatar AQSh pen Iran ázirge shekteýli áskeri shielenisten aýqymdy soǵysqa kóshýden saqtanyp otyrǵan siiaqty», – delingen banktiń analitikalyq jazbasynda.
Iaǵni investorlar ázirge qaqtyǵys jahandyq munai jetkizilimine eleýli qaýip tóndiredi dep eseptemeidi.
Bir aptadaǵy tómendeý
Apta basynan beri Brent markaly munaidyń baǵasy 9,3%-ǵa, al WTI shamamen 8%-ǵa arzandaǵan. Bul kórsetkishter AQSh pen Iran arasyndaǵy áskeri áreketter qaita bastalǵan kezeńge sáikes kelip otyr.
Áýe kompaniialary shyǵynǵa batyp jatyr
Sonymen qatar janarmai baǵasynyń qubylmalylyǵy aviatsiia salasyna da áser etýde. Birneshe áýe tasymaldaýshysyna, sonyń ishinde British Airways áýe kompaniiasyna ielik etetin International Airlines Group (IAG) ekinshi toqsandaǵy operatsiialyq paidasy 16%-ǵa azaiǵanyn habarlady. Kompaniia muny aviatsiialyq otyn shyǵyndarynyń kúrt ósýimen bailanystyrdy.
Sondai-aq IAG biylǵy jyldyń sońyna deiin jolaýshylar tasymalynyń kólemin arttyrýdy josparlamaitynyn málimdedi.
