АҚШ пен Иран арасындағы әскери іс-қимылдардың қайта жандануына қарамастан, әлемдік мұнай бағасы төмендеуін жалғастырып жатыр, деп хабарлайды dalanews.kz.
Соңғы тәулікте Brent маркалы мұнайдың бағасы 1,4%-ға төмендеп, бір баррелі шамамен 88 долларға түсті. Ал америкалық WTI мұнайы да 1,4%-ға арзандап, 82 доллар деңгейіне дейін төмендеген.
Нарық неге сабыр сақтап отыр?
Deutsche Bank сарапшыларының пікірінше, мұнай бағасының күрт қымбаттамауына бірнеше фактор әсер етіп отыр.
«Ормуз бұғазы арқылы кеме қатынасы қиындағанымен, толық тоқтаған жоқ. Сонымен қатар АҚШ пен Иран әзірге шектеулі әскери шиеленістен ауқымды соғысқа көшуден сақтанып отырған сияқты», – делінген банктің аналитикалық жазбасында.
Яғни инвесторлар әзірге қақтығыс жаһандық мұнай жеткізіліміне елеулі қауіп төндіреді деп есептемейді.
Бір аптадағы төмендеу
Апта басынан бері Brent маркалы мұнайдың бағасы 9,3%-ға, ал WTI шамамен 8%-ға арзандаған. Бұл көрсеткіштер АҚШ пен Иран арасындағы әскери әрекеттер қайта басталған кезеңге сәйкес келіп отыр.
Әуе компаниялары шығынға батып жатыр
Сонымен қатар жанармай бағасының құбылмалылығы авиация саласына да әсер етуде. Бірнеше әуе тасымалдаушысына, соның ішінде British Airways әуе компаниясына иелік ететін International Airlines Group (IAG) екінші тоқсандағы операциялық пайдасы 16%-ға азайғанын хабарлады. Компания мұны авиациялық отын шығындарының күрт өсуімен байланыстырды.
Сондай-ақ IAG биылғы жылдың соңына дейін жолаушылар тасымалының көлемін арттыруды жоспарламайтынын мәлімдеді.
