AQSh 2026 jylǵy 30 qyrkúiekke deiin Iraktaǵy áskeri kúshterin tolyq shyǵarady. Bul týraly AQSh prezidenti Donald Tramp pen Irak premer-ministri Áli áz-Zeididiń Aq úidegi kezdesýinen keiin málim boldy, dep habarlaidy dalanews.kz.
AP News málimetinshe, Donald Tramptyń aitýynsha, amerikalyq áskeri kúshter endi Irakta qajet emes. Keiin AQSh Qorǵanys ministrligi áskerdi shyǵarý 2024 jyly Vashington men Baǵdad arasynda jasalǵan kelisim aiasynda júzege asyrylatynyn naqtylady.
Kelisim halyqaralyq koalitsiianyń «Islam memleketi» (IM, kóptegen elde terroristik uiym retinde tanylyp, qyzmetine tyiym salynǵan) uiymyna qarsy missiiasyn aiaqtaýdy kózdeidi.
Amerikalyq áskeri kúshter ketkennen keiin eldegi qaýipsizdikti qamtamasyz etý mindeti AQSh-tyń qoldaýymen daiyndyqtan ótken Iraktyń qaýipsizdik kúshterine júkteledi.
AQSh áskeri Irakta 2003 jyldan beri ornalasqan. Sol jyly Vashington Saddam Hýsein rejimine qarsy áskeri operatsiia bastaǵan edi. Áskeri naýqannyń eń qyzǵan shaǵynda, 2007 jyly, Iraktaǵy amerikalyq ásker sany 170 myńnan asqan.
Keiin áskeri kontingent birtindep qysqartyldy. Alaida 2014 jyly «Islam memleketi» uiymyna qarsy kúres júrgizý úshin amerikalyq áskeri qyzmetshilerdiń bir bóligi qaitadan Irakqa jiberildi.
2021 jylǵa qarai ekstremistik uiym negizgi baqylaýyndaǵy aýmaqtarynan aiyrylyp, Iraktaǵy AQSh áskeri kontingentiniń sany shamamen 2 500 adamǵa deiin azaidy.
Qazirgi ýaqytta Irakta negizinen áskeri keńesshiler men shaǵyn áskeri bólim ǵana qalyp otyr. Olar da qyrkúiek aiynyń sońyna deiin elden tolyq shyǵarylýy josparlanyp otyr.
