اقش 2026 جىلعى 30 قىركٷيەككە دەيٸن يراكتاعى ەسكەري كٷشتەرٸن تولىق شىعارادى. بۇل تۋرالى اقش پرەزيدەنتٸ دونالد ترامپ پەن يراك پرەمەر-مينيسترٸ ەلي ەز-زەيديدٸڭ اق ٷيدەگٸ كەزدەسۋٸنەن كەيٸن مەلٸم بولدى, دەپ حابارلايدى dalanews.kz.
AP News مەلٸمەتٸنشە, دونالد ترامپتىڭ ايتۋىنشا, امەريكالىق ەسكەري كٷشتەر ەندٸ يراكتا قاجەت ەمەس. كەيٸن اقش قورعانىس مينيسترلٸگٸ ەسكەردٸ شىعارۋ 2024 جىلى ۆاشينگتون مەن باعداد اراسىندا جاسالعان كەلٸسٸم اياسىندا جٷزەگە اسىرىلاتىنىن ناقتىلادى.
كەلٸسٸم حالىقارالىق كواليتسييانىڭ «يسلام مەملەكەتٸ» (يم, كٶپتەگەن ەلدە تەرروريستٸك ۇيىم رەتٸندە تانىلىپ, قىزمەتٸنە تىيىم سالىنعان) ۇيىمىنا قارسى ميسسيياسىن اياقتاۋدى كٶزدەيدٸ.
امەريكالىق ەسكەري كٷشتەر كەتكەننەن كەيٸن ەلدەگٸ قاۋٸپسٸزدٸكتٸ قامتاماسىز ەتۋ مٸندەتٸ اقش-تىڭ قولداۋىمەن دايىندىقتان ٶتكەن يراكتىڭ قاۋٸپسٸزدٸك كٷشتەرٸنە جٷكتەلەدٸ.
اقش ەسكەرٸ يراكتا 2003 جىلدان بەرٸ ورنالاسقان. سول جىلى ۆاشينگتون ساددام حۋسەين رەجيمٸنە قارسى ەسكەري وپەراتسييا باستاعان ەدٸ. ەسكەري ناۋقاننىڭ ەڭ قىزعان شاعىندا, 2007 جىلى, يراكتاعى امەريكالىق ەسكەر سانى 170 مىڭنان اسقان.
كەيٸن ەسكەري كونتينگەنت بٸرتٸندەپ قىسقارتىلدى. الايدا 2014 جىلى «يسلام مەملەكەتٸ» ۇيىمىنا قارسى كٷرەس جٷرگٸزۋ ٷشٸن امەريكالىق ەسكەري قىزمەتشٸلەردٸڭ بٸر بٶلٸگٸ قايتادان يراكقا جٸبەرٸلدٸ.
2021 جىلعا قاراي ەكسترەميستٸك ۇيىم نەگٸزگٸ باقىلاۋىنداعى اۋماقتارىنان ايىرىلىپ, يراكتاعى اقش ەسكەري كونتينگەنتٸنٸڭ سانى شامامەن 2 500 ادامعا دەيٸن ازايدى.
قازٸرگٸ ۋاقىتتا يراكتا نەگٸزٸنەن ەسكەري كەڭەسشٸلەر مەن شاعىن ەسكەري بٶلٸم عانا قالىپ وتىر. ولار دا قىركٷيەك ايىنىڭ سوڭىنا دەيٸن ەلدەن تولىق شىعارىلۋى جوسپارلانىپ وتىر.
