«Aq jol» partiia tóraǵasynyń orynbasarlary Dmitrii Vasilev pen Berik Dúisembinov oblys kásipkerlerimen ótken dóńgelek ústel jumysyna qatysty. Kandidattar biznes ókilderine partiia baǵdarlamasynyń alty basym baǵyty týraly aityp berdi.
Biznesti damytý, nesieniń qymbat mólsherlemeleri, offshorlyq esepshottardaǵy halyq qarajatyn Qazaqstanǵa qaitarý týraly tarmaqtar óńir turǵyndarynan qoldaý tapty.
Jastardy ipotekalyq nesie máselesi tolǵandyrdy. Al kásipkerlerdiń aitýynsha, sheksiz múmkindikke ie sot oryndaýshylarynyń áreketine narazy. Olar kompaniialardyń esepshottaryn buǵattap, tabys taýyp, qaryzdarynan qutylýyna kedergi jasaidy.
Kásiporyndardy dizeldik otynmen qamtamasyz etý máselesinde de kereǵar jaǵdai týyndaýda. Halyqqa, aýyl sharýashylyǵyna jeńildikter qarastyrylsa, kenishter men kólik kompaniialary ony 3 ese qymbatqa satyp alýǵa májbúr. Olardyń kópshiligi bankrottyqtyń aldynda tur.
«Bul máselelerdiń barlyǵy baqylaýda bolady» dep sendirdi Dmitrii Vasilev.
Biznes partiiasy óz tarapynan kásipkerlik salasyndaǵy máselelerdi sheshýdiń birqatar joldaryn usynýǵa daiyn. Atap aitqanda, áleýmettik mańyzy bar taýarlar men biznestiń basym sektorlary úshin 0-6% deńgeiinde qosymsha qun salyǵynyń tómendetilgen mólsherlemelerin engizýdi talap etpekshi.
QR Ulttyq bankiniń ekinshi deńgeidegi banktik nesie boiynsha bazalyq syiaqy mólsherlemesin jyldyq 4-5%-dan aspaityn tiimdi syiaqy mólsherlemesine deiin tómendetý máselesin kóterý qajet. Monopolister tarifteriniń negizdiligin – birinshi kezekte energetika jáne temirjol kóligi salasynda tolyq kólemde tekserý júrgizý kerek.
– Biz aýyldyq jerlerde salyqtardy joiýǵa umtylýdamyz, adamdardyń BJZQ shotyndaǵy qarajatyn ózderi basqarǵanyn qalaimyz, meditsinalyq saqtandyrý naqty bir adamǵa bailanyp, ol kez kelgen emhanada, qajetti ýaqytta kómek ala alatyn bolýy kerek, – dedi Berik Dúisembinov.
«Aqjoldyqtar» jinalǵandardyń suraqtaryna jaýap berip, sailaýshylardyń usynystaryn nazarǵa aldy.
*Materialdyń aqysy «Aq jol» demokratiialyq partiiasynyń sailaý qorynan tólendi.
