«Sailaý qarsańynda Barysov saiasi upai jinaý úshin Skliardy synǵa alyp jatyr» dep bul iske bei-jai qarai salýǵa bolar edi. Biraq olai emes ekeni belgili. Barysov isker azamat qana emes, elimizdiń energojúiesin bir kisidei biletin bilikti maman.
Onyń ómir jolyna nazar aýdarǵan adam elimizde berendi kólikter shyǵaryp, órt salasynyń aldyn alatyn júieni oilap tapqan aitar oiy bar azamat ekenin baiqar edi. Sondyqtan Barysov Skliarǵa syn sadaǵyn beker baǵyttap otyrǵan joq. Depýtattyqtan úmitker Barysov bylai deidi:
– Búgin biz Ekibastuz qalasynda apatty jaǵdaidyń qaitalanǵanyna kýá bolyp otyrmyz. Budan túiitkildi máseleni júieli sheshýdiń qajet ekenin baiqaýǵa bolady. Menińshe, apatty jaǵdaidyń qaitalanýyna vitse-premer Roman Skliar kináli, – dep Barysov oiyn irikpei jaiyp salypty.
Skliar vitse-premer bolyp taǵaiyndalǵaly beri elimizde apatty jaǵdai birinen soń biri qaitalandy.
Aitalyq, Arystaǵy oq-dári qoimasyndaǵy jarylys, odan keiin Jambyl oblysy, Baizaq aýdanyndaǵy tótenshe oqiǵa bári-bári esimizde.
Ótken jyly Petropavol qalasyndaǵy jylý ortalyǵyndaǵy apatty jaǵdai, odan keiin Ekibastuz ben Ridderdegi jylý ortalyqtarynda oryn alǵan jait.
Qaita Ridderdegi ahýal isker ákim Danial Ahmetovtyń jedel áreket etkeniniń arqasynda ýshyqqan joq. Ahmetov oblys aýmaǵyndaǵy irgeli óndiris oryndaryndaǵy resýrstardy apatty joiýǵa jumyldyryp, Ridderdi úlken qaýip-qaterden saqtap qaldy.
Jarylys bolyp, eskirgen jylý qazandyqtarynda tótenshe jaǵdai oryn alsa, sol jerge Skliardyń baryp, qara kórsetip qaitatynyn bilemiz.
Ókinishke orai, ázirshe jylý ortalyqtaryn jekeshelendirip, qalypty jumys isteýi úshin tiisti qarjat bólmegen oligarhtardy tezge salyp jumys isteýge Skliardyń shamasy jetpeýde.
Skliar ózi búginde tótenshe oqiǵadan kóz ashpai otyrǵan Pavlodar oblysynyń týmasy. Ekibastuz qalasynyń ákimdiginde jaýapty qyzmetter atqarǵanynda bilemiz. Tipti, 2010-2011 jyldary Pavlodar oblysy ákiminiń birinshi orynbasary bolyp, qyzmet atqarǵan-dy.
Skliardyń jumys tájiribesi men ómir jolyn úńilgen adam onyń kommýnaldyq sharýashylyq, biznes, kólik-logistika salasynda mol tájiribe jinaǵan maman ekenin baiqar edi.
Sondyqtan onyń elimizdiń energojúiesindegi máselelerdiń túiinin tarqatýda qabilet-qarymy jetetine eshkim kúdik keltirmeidi. Biraq jumysynda nátije joq. Nege?
Nazarbaev dáýirinde jergilikti jerdegi tabysty mekemelerdi otbasyna jaqyn adamdar jekeshelendirip alyp, áli kúnge deiin súlikshe soryp keledi. Aitalyq, alysqa barmai-aq, Skliardyń týǵan jeri Pavlodar oblysyndaǵy kommýnaldyq sharýashylyq mekemelerin oligarh Oleg Klebanov baýyryna basyp alǵanyn jurt jaqsy biledi.
Demek, elimizdiń energojúiesinde týyndap jatqan máselelerdiń bári ainalyp kelip, osy Klebanov syndy apai tós oligarhtarǵa baryp tireletinin moiyndaýymyz kerek.
Birinshi kezekte bul máseleni biz emes, vitse-premer Skliar kóterýi kerek. Al eldiń qamyn oilaidy degen Skliaryńyz oligarh Klebanovtyń aibyn betine basyp, áńgime aita almaýda.
Demek, depýtattyqqa kandidat Aibek Barysovtyń elimizdiń energojúiesinde qaitalanǵan apatty jaǵdailar úshin Skliardy aiyptaýy óte oryndy.
