Qazaqstannyń tanymal ánshisi ári mýzykanty Parviz Nazarov Qazaqstanda AES salý jónindegi referendýmǵa qatysty. Mýzykant Bostandyq aýdanyndaǵy Ǵ. Mustafin atyndaǵy №191 mektepte ornalasqan №494 sailaý ýchaskesine bardy, – dep habarlaidy Dalanews.kz.
«Referendým – bul árkimniń elimizdiń bolashaǵyna qatysty pikirin bildirýge múmkindik. Biz ómirimizge jáne keleshek urpaqtyń ómirine áser etetin sheshim qabyldaimyz. Osy mańyzdy úderiske úles qosa alǵanyma qýanyshtymyn», – dedi Parviz Nazarov.
Ánshi Qazaqstan azamattarynyń referendýmǵa qatysýy bul oqiǵanyń qoǵam úshin mańyzdylyǵyn kórsetetinin aitty.
«Árbir azamattyń pikirin bildirýge quqyǵy men múmkindigi bar ekenin umytpaý mańyzdy. Daýys berý nátijesi bizdiń bolashaǵymyzdy qalai kóretinimizdiń jáne elimizdiń igiligi úshin qandai ózgeris qajet ekenin kórsetedi», – dedi ánshi.
Esterińizge salaiyq, búgin Qazaqstanda atom elektr stantsiiasyn salý máselesi boiynsha respýblikalyq referendým ótip jatyr. Almaty ákimi Erbolat Dosaev jubaiymen birge tańerteń №388 mektep-litseiinde ornalasqan sailaý ýchaskesine alǵashqylardyń biri bolyp kelip, daýys berdi. Almatylyqtar sailaý ýchaskelerine baryp, saǵat 20:00-ge deiin daýys bere alady.
