Jetisý oblysyndaǵy Alakól jaǵalaýy taǵy da án men dýmannyń ortasyna ainaldy. Aqshi aýylynda ótken «Alakól tolqyny – 2026» mádeni-týristik festivaline Qazaqstannyń túkpir-túkpirinen kelgen demalýshylarmen qatar sheteldik qonaqtar da qatysty. Mádeniet pen týrizmdi toǵystyrǵan aýqymdy shara óńirdiń týristik áleýetin taǵy bir márte tanytty, dep habarlaidy dalanews.kz.
Kesh túse festival alańyna aǵylǵan halyqtyń qarasy qalyń boldy. Kontsert bastalardan buryn-aq sahna mańyna júzdegen adam jinalyp, tanymal ánshilerdi kútip turdy. Ásirese jastar jaǵy belsendi boldy. Tanymal oryndaýshylar sahnaǵa shyqqanda kórermender súiikti ánderin qosyla shyrqap, bilep, ár ándi erekshe yqylaspen qarsy aldy.
Festival Alakól óńiriniń týristik múmkindikteri, tabiǵi erekshelikteri men tarihi-mádeni murasyn tanystyratyn arnaiy beinerolikten bastaldy. Resmi bólimde óńirde týrizm salasyn damytý, infraqurylymdy jetildirý jáne Alakóldi halyqaralyq deńgeidegi týristik baǵyt retinde qalyptastyrý baǵytynda atqarylyp jatqan jumystar aityldy.
Qazaqstan Respýblikasy Týrizm jáne sport vitse-ministri Miras Tólebaev óz sózinde Alakóldiń elimizdegi mańyzdy týristik aimaqtardyń biri ekenin atap ótti. Onyń aitýynsha, mundai mádeni-týristik jobalar óńirdiń ǵana emes, tutas Qazaqstannyń týristik imidjin nyǵaitýǵa yqpal etedi.
Resmi bólimnen keiin jaǵalaýdaǵy basty alańda kontserttik baǵdarlama bastaldy. Kórermender Rimma Ahmetova, Qazbek Abý, Dana Maksimova, Samat Janǵazin, Alýa Bereshova, Beksultan Bekaidarov, Gúlsim Malisova, Jiger Arap jáne Baýyrjan Kenjebaevtyń ónerin tamashalady.
Festival aiasynda qonaqtarǵa arnalǵan túrli oiyn-saýyq baǵdarlamalary da uiymdastyryldy. Hodýlisterdiń qoiylymdary, tiri músinder men alyp oiynshyq keiipkerler balalar men eresekterdiń qyzyǵýshylyǵyn týdyrdy. Qonaqtar arnaiy fotozonalarda sýretke túsip, interaktivti oiyndarǵa qatysyp, syilyqtarǵa ie boldy.
Al festivaldiń basty hedlainerleri Turar, Ayree jáne Asel Mekebaeva óner kórsetken sátte alańdaǵy atmosfera tipti qyza tústi. Kórermender ánshilermen birge án aityp, jaryq shamdaryn jaǵyp, kontserttiń ár sátin uialy telefondaryna túsirip jatty.
Aqshi aýylynyń turǵyny Gúlmira Tóleýbaeva bul festivaldiń jergilikti halyq úshin erekshe mańyzǵa ie ekenin aitady.
– Biz bul festivaldi jyl saiyn kútemiz. Jaz saiyn Alakólge qanshama týrist keledi. Osyndai mádeni sharalardyń uiymdastyrylýy demalýshylarǵa da, jergilikti turǵyndarǵa da jaqsy kóńil kúi syilaidy. Biyl adam óte kóp boldy. Kontsert te erekshe ótti, – deidi ol.
Al Qaraǵandy qalasynan kelgen demalýshy Erjan Seiitov kúndiz sahnanyń daiyndalyp jatqanyn kórgenin aityp, keshki baǵdarlamadan úlken áser alǵanyn jetkizdi.
– Kúndiz jaǵajaida júrgende festivalge daiyndyq júrip jatqanyn kórdik. Keshke arnaiy keldik. Shynymdy aitsam, mundai aýqymdy kontsert bolady dep oilamadym. Ánshiler de tanymal, halyqtyń kóńil kúii de keremet boldy. Alakóldegi demalysymyzdyń eń este qalǵan keshteriniń birine ainaldy, – deidi týrist.
Festival barysynda qaýipsizdik máselesine de erekshe nazar aýdaryldy. Kontsert alańynda politsiia qyzmetkerleri men patrýldik jasaqtar turaqty baqylaý júrgizip, qoǵamdyq tártipti qadaǵalap júrdi. Al alań syrtynda jedel járdem kólikteri kezekshilik atqaryp, tótenshe jaǵdailarǵa daiyn turdy.
Kesh barysynda kásibi DJ-diń qatysýymen zamanaýi mýzykalyq baǵdarlama uiymdastyrylyp, ashyq aspan astyndaǵy bi alańynda myńdaǵan adam bas qosty.
Keshtiń eń áserli sáti merekelik otshashý boldy desek artyq aitqandyq emes. Ár jarqyl saiyn kórermender qol shapalaqtap, tańdanysyn jasyra almady. Kópshilik úshin festivaldiń dál osy finaly keshtiń eń este qalǵan sátine ainaldy.
Osylaisha «Alakól tolqyny – 2026» festivali tek kontserttik baǵdarlama ǵana emes, myńdaǵan adamdy biriktirgen úlken týristik ári mádeni oqiǵa retinde este qaldy. Án men tolqyn úndesken bul kesh Alakóldiń tek demalys orny ǵana emes, jarqyn mádeni sharalar ótetin ortalyqqa ainalyp kele jatqanyn taǵy bir márte kórsetti.
Jetisý oblysy Týrizm basqarmasynyń málimetinshe, biylǵy festivalge Qytai, Resei, Belarýs, Ózbekstan jáne Qyrǵyzstannan kelgen týristerdi qosa alǵanda 5 myńnan astam adam jinaldy. Sonymen qatar is-sharany nasihattaýǵa 40-qa jýyq bloger atsalysty. Uiymdastyrýshylardyń málimetinshe, festival týraly jariialanymdardyń jalpy onlain qamtylýy 5 millionnan astam qaralymǵa jetken.
«Alakól tolqyny – 2026» festivaliniń basty maqsaty – Jetisý oblysynyń týristik áleýetin keńinen tanytý, Alakóldiń halyqaralyq týristik baǵyt retindegi bedelin arttyrý jáne ishki ári kelý týrizmin damytý.
