Atyraý munai óńdeý zaýytynyń (AMÓZ) burynǵy basshysy Murat Dosmuratov qaitadan sotqa tartylady. Joǵarǵy sot qalalyq jáne oblystyq sottardyń burynǵy sheshimderin buzyp, isti qaita qaraýǵa joldady, - dep habarlaidy Dalanews.kz "Aq Jaiyq" basylymyna siltep.
Dosmuratovqa qatysty is
Byltyr kúzde Dosmuratov salǵyrttyq jasaǵany úshin kináli dep tanyldy. Tergeý dereginshe, ol AMÓZ direktory bolyp turǵan kezde jylý almastyrǵyshty kepildik boiynsha tegin jóndetýdi talap etpei, shamamen 2 milliard teńgege jańa kelisimshart jasaǵan.
Nátijesinde ol kináli dep tanylǵanymen, merzimi ótýine bailanysty qylmystyq jaýapkershilikten bosatyldy. Degenmen memleket paidasyna 1 milliard 971 million 424 myń teńge kóleminde materialdyq shyǵyn, 19 million 714 myń teńge memlekettik baj jáne 30 630 teńge kóleminde jábirlenýshilerdi óteý qoryna májbúrli tólem óndirildi.
2025 jyly 31 qańtarda apelliatsiialyq instantsiianyń qaýlysymen úkim ózgertilip, Dosmuratovqa Qylmystyq kodekstiń 371-baby 2-bóligi boiynsha 6 million 900 myń teńge aiyppul salyndy.
Prokýror D.Áýbákirov Dosmuratovtyń shaǵymyn qoldap, isti toqtatýdy surady. Advokat A.Izdibaev pen qorǵaýshy N.Dosmuratova da úkimniń kúshin joiyp, aqtaý týraly ótinish berdi.
Nátijesinde Joǵarǵy sot ta burynǵy bas direktordy jaqtap, aldyńǵy sottardyń sheshimderi naqty mán-jailarǵa sai kelmeidi jáne kinásiz adam jaýapqa tartylǵan dep tapty.
Is materialdaryn zerdelegennen keiin sot alqasy bul tujyrymmen kelisip, isti qaita qaraýǵa jiberdi.
Bas prokýratýranyń pikirinshe, burynǵy sot instantsiialary birneshe qatege jol bergen. Sonyń ishinde:
-
Jabdyq jetkizýshi kompaniialarmen hat almasýdy durys túsinbegen;
-
Aqaýdyń Dosmuratov qyzmetke kelmei turyp jasalǵan paidalaný reglamentinen bolǵanyn elemegen;
-
Jabdyq merdigerlerge eskertilmei iske qosylǵan, bul da ol taǵaiyndalǵansha bolǵan;
-
Jóndeý týraly sheshimdi saraptamalyq keńes Dosmuratovtyń qatysýynsyz qabyldaǵan;
-
Jańa kelisimshart jasalǵan kezde kepildik máselesi áldeqashan jabylǵan.
Budan bólek sot negizgi kýálardan jaýap almaǵan, tehnikalyq reglamentke baǵa bermegen jáne mamannyń qorytyndysyn elemegen.
Aita ketsek, birinshi instantsiiadaǵy sot Dosmuratovty kináli dep tanydy. Ol AMÓZ direktory bolyp turǵan kezde 2021 jylǵy 17 mamyrda "AVC Production" JShS-men jasalǵan kelisimsharttaǵy kepildik mindettemeler aiasynda jylý almastyrǵyshty jóndeýge shara qoldanbaǵan. Onyń ornyna 2022 jylǵy 29 qyrkúiekte "Grif Kazakhstan" JShS jáne "EON Energo" kompaniiasynan quralǵan konsortsiýmmen jalpy somasy 1 mlrd 971 mln teńgege jańa kelisimshart jasaǵan. Osylaisha zaýyttyń múddesine ziian keltirgen dep tanylǵan.
Alaida Joǵarǵy sot AMÓZ Alfa Laval kompaniiasynyń jylý almastyrǵyshyn eki ret satyp alǵanyn, alǵashqysy 2016 jyly, ekinshisi 2021 jyly ornatylǵanyn anyqtady.
Jańa derek
Sot aiyptaý úkimi joramaldaýǵa súienbeýi kerek ekenin málimdedi. Sondyqtan áli suralmaǵan kýálardy shaqyryp, tolyq zerttelmegen qujattardy qaita qaraý qajet. Dosmuratovtyń áreketterine qaita baǵa beriledi.
Áńgime AMÓZ-ge ornatylǵan Alfa Laval kompaniiasynyń jylý almastyrǵyshy jaily bolyp otyr. Birinshi qurylǵy zaýytqa 2016 jyly, ekinshisi 2021 jyly jetkizilgen. Ekeýi de buzylǵan. Saraptama nátijesinde buzylý sebebi zaýytqa jetkiziletin gazdyń qysymy tómendiginen bolǵany anyqtalǵan. Muny qurylǵyny shyǵarýshy kompaniia da rastaǵan.
Jóndeý jasalǵanymen, aqaý tolyq joiylmaǵan. Sottyń pikirinshe, Dosmuratov kepildik jóndeýin talap etpei, basqa merdigermen jańa kelisimshart jasaǵan. Biraq qorǵaýshynyń aitýynsha, Dosmuratov bul kelisimge deiin qabyldanǵan sheshimder aiasynda áreket etken, sondyqtan oǵan deiin ketken qateler úshin jaýapty bolmaýy kerek.
Qazir sottyń naqty kúni belgisiz. Sottyń baspasóz qyzmeti málimetinshe, materialdar sotqa áli túspegen.
