اتىراۋ مۇناي وڭدەۋ زاۋىتىنىڭ (ءاموز) بۇرىنعى باسشىسى مۇرات دوسمۇراتوۆ قايتادان سوتقا تارتىلادى. جوعارعى سوت قالالىق جانە وبلىستىق سوتتاردىڭ بۇرىنعى شەشىمدەرىن بۇزىپ، ءىستى قايتا قاراۋعا جولدادى، - دەپ حابارلايدى Dalanews.kz "اق جايىق" باسىلىمىنا سىلتەپ.

دوسمۇراتوۆقا قاتىستى ءىس

بىلتىر كۇزدە دوسمۇراتوۆ سالعىرتتىق جاساعانى ءۇشىن كىنالى دەپ تانىلدى. تەرگەۋ دەرەگىنشە، ول ءاموز ديرەكتورى بولىپ تۇرعان كەزدە جىلۋ الماستىرعىشتى كەپىلدىك بويىنشا تەگىن جوندەتۋدى تالاپ ەتپەي، شامامەن 2 ميلليارد تەڭگەگە جاڭا كەلىسىمشارت جاساعان.

ناتيجەسىندە ول كىنالى دەپ تانىلعانىمەن، مەرزىمى وتۋىنە بايلانىستى قىلمىستىق جاۋاپكەرشىلىكتەن بوساتىلدى. دەگەنمەن مەملەكەت پايداسىنا 1 ميلليارد 971 ميلليون 424 مىڭ تەڭگە كولەمىندە ماتەريالدىق شىعىن، 19 ميلليون 714 مىڭ تەڭگە مەملەكەتتىك باج جانە 30 630 تەڭگە كولەمىندە جابىرلەنۋشىلەردى وتەۋ قورىنا ءماجبۇرلى تولەم ءوندىرىلدى.

2025 جىلى 31 قاڭتاردا اپەللياسيالىق ينستانسيانىڭ قاۋلىسىمەن ۇكىم وزگەرتىلىپ، دوسمۇراتوۆقا قىلمىستىق كودەكستىڭ 371-بابى 2-بولىگى بويىنشا 6 ميلليون 900 مىڭ تەڭگە ايىپپۇل سالىندى.

پروكۋرور د.اۋباكىروۆ دوسمۇراتوۆتىڭ شاعىمىن قولداپ، ءىستى توقتاتۋدى سۇرادى. ادۆوكات ا.ىزدىبايەۆ پەن قورعاۋشى ن.دوسمۇراتوۆا دا ۇكىمنىڭ كۇشىن جويىپ، اقتاۋ تۋرالى ءوتىنىش بەردى.

ناتيجەسىندە جوعارعى سوت تا بۇرىنعى باس ديرەكتوردى جاقتاپ، الدىڭعى سوتتاردىڭ شەشىمدەرى ناقتى ءمان-جايلارعا ساي كەلمەيدى جانە كىناسىز ادام جاۋاپقا تارتىلعان دەپ تاپتى.

ءىس ماتەريالدارىن زەردەلەگەننەن كەيىن سوت القاسى بۇل تۇجىرىممەن كەلىسىپ، ءىستى قايتا قاراۋعا جىبەردى.

باس پروكۋراتۋرانىڭ پىكىرىنشە، بۇرىنعى سوت ينستانسيالارى بىرنەشە قاتەگە جول بەرگەن. سونىڭ ىشىندە:

• جابدىق جەتكىزۋشى كومپانيالارمەن حات الماسۋدى دۇرىس تۇسىنبەگەن؛

• اقاۋدىڭ دوسمۇراتوۆ قىزمەتكە كەلمەي تۇرىپ جاسالعان پايدالانۋ رەگلامەنتىنەن بولعانىن ەلەمەگەن؛

• جابدىق مەردىگەرلەرگە ەسكەرتىلمەي ىسكە قوسىلعان، بۇل دا ول تاعايىندالعانشا بولعان؛

• جوندەۋ تۋرالى شەشىمدى ساراپتامالىق كەڭەس دوسمۇراتوۆتىڭ قاتىسۋىنسىز قابىلداعان؛

• جاڭا كەلىسىمشارت جاسالعان كەزدە كەپىلدىك ماسەلەسى الدەقاشان جابىلعان.

بۇدان بولەك سوت نەگىزگى كۋالاردان جاۋاپ الماعان، تەحنيكالىق رەگلامەنتكە باعا بەرمەگەن جانە ماماننىڭ قورىتىندىسىن ەلەمەگەن.

ايتا كەتسەك، ءبىرىنشى ينستانسياداعى سوت دوسمۇراتوۆتى كىنالى دەپ تانىدى. ول ءاموز ديرەكتورى بولىپ تۇرعان كەزدە 2021 جىلعى 17 مامىردا "AVC Production" جشس-مەن جاسالعان كەلىسىمشارتتاعى كەپىلدىك مىندەتتەمەلەر اياسىندا جىلۋ الماستىرعىشتى جوندەۋگە شارا قولدانباعان. ونىڭ ورنىنا 2022 جىلعى 29 قىركۇيەكتە "Grif Kazakhstan" ج ش س جانە "ەون ەنەرگو" كومپانياسىنان قۇرالعان كونسورسيۋممەن جالپى سوماسى 1 ملرد 971 ملن تەڭگەگە جاڭا كەلىسىمشارت جاساعان. وسىلايشا زاۋىتتىڭ مۇددەسىنە زيان كەلتىرگەن دەپ تانىلعان.

الايدا جوعارعى سوت ءاموز Alfa Laval كومپانياسىنىڭ جىلۋ الماستىرعىشىن ەكى رەت ساتىپ العانىن، العاشقىسى 2016 جىلى، ەكىنشىسى 2021 جىلى ورناتىلعانىن انىقتادى.

جاڭا دەرەك

سوت ايىپتاۋ ۇكىمى جورامالداۋعا سۇيەنبەۋى كەرەك ەكەنىن مالىمدەدى. سوندىقتان ءالى سۇرالماعان كۋالاردى شاقىرىپ، تولىق زەرتتەلمەگەن قۇجاتتاردى قايتا قاراۋ قاجەت. دوسمۇراتوۆتىڭ ارەكەتتەرىنە قايتا باعا بەرىلەدى.

اڭگىمە اموز-گە ورناتىلعان Alfa Laval كومپانياسىنىڭ جىلۋ الماستىرعىشى جايلى بولىپ وتىر. ءبىرىنشى قۇرىلعى زاۋىتقا 2016 جىلى، ەكىنشىسى 2021 جىلى جەتكىزىلگەن. ەكەۋى دە بۇزىلعان. ساراپتاما ناتيجەسىندە بۇزىلۋ سەبەبى زاۋىتقا جەتكىزىلەتىن گازدىڭ قىسىمى تومەندىگىنەن بولعانى انىقتالعان. مۇنى قۇرىلعىنى شىعارۋشى كومپانيا دا راستاعان.

جوندەۋ جاسالعانىمەن، اقاۋ تولىق جويىلماعان. سوتتىڭ پىكىرىنشە، دوسمۇراتوۆ كەپىلدىك جوندەۋىن تالاپ ەتپەي، باسقا مەردىگەرمەن جاڭا كەلىسىمشارت جاساعان. ءبىراق قورعاۋشىنىڭ ايتۋىنشا، دوسمۇراتوۆ بۇل كەلىسىمگە دەيىن قابىلدانعان شەشىمدەر اياسىندا ارەكەت ەتكەن، سوندىقتان وعان دەيىن كەتكەن قاتەلەر ءۇشىن جاۋاپتى بولماۋى كەرەك.

ءقازىر سوتتىڭ ناقتى كۇنى بەلگىسىز. سوتتىڭ باسپا ءسوز قىزمەتى مالىمەتىنشە، ماتەريالدار سوتقا ءالى تۇسپەگەن.