Másele bizde bolsa bir jón, saiasatker suhbat berýin doǵarar emes. Bul joly Ferǵana agenttiginiń tilshisimen tildesken Qosanov gazetke basýǵa suranyp turǵan birde-ekili oqshaý oi aitypty. Amalsyz aýdardyq.
Saiasatker áli de bolsa raiynan qaitpapty. Ózine daýys bergen sailaýshylardy satyp kettim dep sanamaidy. Ótken sailaýdyń nátijesine ókingenimen, opyq jedim dep oilamaidy.
Kerisinshe, Parlament sailaýynda bir judyryqqa jumylyp, ujymdasýǵa shaqyryp otyr.
Ol bylai deidi:
«Túnniń bir ýaǵy edi. On oilandym, júz tolǵandym. Sheshimdi ózim qabyldadym.
Iá, erteńgi kúni meni júreksizdigim úshin tabalap, álsizdigim úshin jazǵyratyndar atoilap shyǵatynyn bildim.
Sonda da bolsa ishtegi túisik jibermedi. Ishki túisikke súienip, sailaý nátijesi týraly málimdeme jasadym. Bul meniń tańdaýym edi», – deidi Qosanov.
...
«Sailaýdan soń birtalai adammen júzdesip, didarlastym. Qonaqqa da bardyq, toida da júrdik. Kópshiligi: «Men sizge daýys berdim» – dedi.
Álbette olarǵa alǵystan basqa aitarym joq. Áitkenmen, sizderdiń Qosanovty qoldaǵandaryńyz, bizdiń jeńiske jeterimizdi bildirmeidi», – deidi saiasatker.
...
«Men, myna men sailaýdy moiyndasam da, bilikti moiyndaǵan joqpyn.
Eger Toqaevtyń jeńisin joqqa shyǵarar bolsam, kelesi kúni Ábliazovtyń aitaǵyna erip, tapa-tal túste alańda turar edim.
Eger alańǵa shyǵar bolsam bilik te bes qarýyn sailap qarsy jaýap qatýǵa ázirlener edi.
Ábliazovtiń áláýláii ánsheiin dúniege ainalyp, alańǵa 4 myń emes, 15-20 myń adam dúr kóterilip shyǵar edi. Ashynǵan halyq pen zulymdyq jasaýdan taiynbaityn biliktiń arasynda qantógis bolar edi. Bilik ereýilge shyqqan eldi aiaýsyz basyp, janyshtar edi.
Búgingi júie bilikti ońaishylyqpen bermeidi. Eger meniń sońymda tórt qubylasy túgel, airandai uiyǵan oppozitsiia turǵanda múlde bólek sheshim qabyldar ma edim...».
...
«Bul isti ózge bir saiasatker moinyna alǵysy kelse, halyqtyń qany tógilgenin qalasa, analardyń kóz jasyna qalǵysy kelse alańǵa bastap barsyn, qarsylyǵym joq. Tek men emes!
Meniń it terimdi basyma qaptaǵandar meni qansha jerden ájýalap, qorlaǵysy kelse de bir nárseni joqqa shyǵara almaidy.
Meniń sailaýǵa qatysýym qoǵamdaǵy azamattyq belsendilikti buryn-sońdy bolmaǵan deńgeige shyǵardy»
...
«Keide oilaimyn, osy sailaýǵa qatyspai-aq qoiǵanym durys bolar ma edi dep...».
...
«Sailaý ótti. Dúnie búlingen joq. Kóshede emin-erkin júremin. Tanyǵandar ainalyp ótpei, aman-saýlyq surasyp jatady.
Keibireýler WhatsApp-qa jazyp, durys sheshim qabyldaǵanymdy aityp, quptap jatady.
Eldegi tynyshtyqty shaiqap-tókpei, sabyrlyq saqtaǵanym úshin alǵys aitatyndar óte kóp. Olardyń arasynda igi jaqsylar da, kásipkerler de, qarapaiym adamdar da jetip artylady. Ózim de aityp júrmin, biz tóńkeris emes, evolotsiianyń soqpaǵymen júrý kerekpiz».
...
«Dál qazir «Nur Otanǵa» qarsy azamattar bir jaǵadan – bas, bir jeńnen qol shyǵaryp, aitys-tartysty doǵaryp: «jigitter, bul biz úshin Parlamentke óter ońtaily sát», – degen urannyń tóńiregine toptasýy kerek. Men barlyǵyn ókpe-renishti umytýǵa shaqyramyn».
Daiyndaǵan Dýman BYQAI
