ماسەلە بىزدە بولسا ءبىر ءجون، ساياساتكەر سۇحبات بەرۋىن دوعارار ەمەس. بۇل جولى فەرعانا اگەنتتىگىنىڭ تىلشىسىمەن تىلدەسكەن قوسانوۆ گازەتكە باسۋعا سۇرانىپ تۇرعان بىردە-ەكىلى وقشاۋ وي ايتىپتى. امالسىز اۋداردىق.
ساياساتكەر ءالى دە بولسا رايىنان قايتپاپتى. وزىنە داۋىس بەرگەن سايلاۋشىلاردى ساتىپ كەتتىم دەپ سانامايدى. وتكەن سايلاۋدىڭ ناتيجەسىنە وكىنگەنىمەن، وپىق جەدىم دەپ ويلامايدى.
كەرىسىنشە، پارلامەنت سايلاۋىندا ءبىر جۇدىرىققا جۇمىلىپ، ۇجىمداسۋعا شاقىرىپ وتىر.
ول بىلاي دەيدى:
«ءتۇننىڭ ءبىر ۋاعى ەدى. ون ويلاندىم، ءجۇز تولعاندىم. شەشىمدى ءوزىم قابىلدادىم.
ءيا، ەرتەڭگى كۇنى مەنى جۇرەكسىزدىگىم ءۇشىن تابالاپ، السىزدىگىم ءۇشىن جازعىراتىندار اتويلاپ شىعاتىنىن ءبىلدىم.
سوندا دا بولسا ىشتەگى تۇيسىك جىبەرمەدى. ىشكى تۇيسىككە سۇيەنىپ، سايلاۋ ناتيجەسى تۋرالى مالىمدەمە جاسادىم. بۇل مەنىڭ تاڭداۋىم ەدى»، – دەيدى قوسانوۆ.
...
«سايلاۋدان سوڭ ءبىرتالاي اداممەن جۇزدەسىپ، ديدارلاستىم. قوناققا دا باردىق، تويدا دا جۇردىك. كوپشىلىگى: «مەن سىزگە داۋىس بەردىم» – دەدى.
البەتتە ولارعا العىستان باسقا ايتارىم جوق. ايتكەنمەن، سىزدەردىڭ قوسانوۆتى قولداعاندارىڭىز، ءبىزدىڭ جەڭىسكە جەتەرىمىزدى بىلدىرمەيدى»، – دەيدى ساياساتكەر.
...
«مەن، مىنا مەن سايلاۋدى مويىنداسام دا، بيلىكتى مويىنداعان جوقپىن.
ەگەر توقايەۆتىڭ جەڭىسىن جوققا شىعارار بولسام، كەلەسى كۇنى ءابليازوۆتىڭ ايتاعىنا ەرىپ، تاپا-تال تۇستە الاڭدا تۇرار ەدىم.
ەگەر الاڭعا شىعار بولسام بيلىك تە بەس قارۋىن سايلاپ قارسى جاۋاپ قاتۋعا ازىرلەنەر ەدى.
ءابليازوۆتىڭ ءالاۋلايى انشەيىن دۇنيەگە اينالىپ، الاڭعا 4 مىڭ ەمەس، 15-20 مىڭ ادام ءدۇر كوتەرىلىپ شىعار ەدى. اشىنعان حالىق پەن زۇلىمدىق جاساۋدان تايىنبايتىن بيلىكتىڭ اراسىندا قانتوگىس بولار ەدى. بيلىك ەرەۋىلگە شىققان ەلدى اياۋسىز باسىپ، جانىشتار ەدى.
بۇگىنگى جۇيە بيلىكتى وڭايشىلىقپەن بەرمەيدى. ەگەر مەنىڭ سوڭىمدا ءتورت قۇبىلاسى تۇگەل، ايرانداي ۇيىعان وپپوزيسيا تۇرعاندا مۇلدە بولەك شەشىم قابىلدار ما ەدىم...».
...
«بۇل ءىستى وزگە ءبىر ساياساتكەر موينىنا العىسى كەلسە، حالىقتىڭ قانى توگىلگەنىن قالاسا، انالاردىڭ كوز جاسىنا قالعىسى كەلسە الاڭعا باستاپ بارسىن، قارسىلىعىم جوق. تەك مەن ەمەس!
مەنىڭ يت تەرىمدى باسىما قاپتاعاندار مەنى قانشا جەردەن ءاجۋالاپ، قورلاعىسى كەلسە دە ءبىر نارسەنى جوققا شىعارا المايدى.
مەنىڭ سايلاۋعا قاتىسۋىم قوعامداعى ازاماتتىق بەلسەندىلىكتى بۇرىن-سوڭدى بولماعان دەڭگەيگە شىعاردى»
...
«كەيدە ويلايمىن، وسى سايلاۋعا قاتىسپاي-اق قويعانىم دۇرىس بولار ما ەدى دەپ...».
...
«سايلاۋ ءوتتى. دۇنيە بۇلىنگەن جوق. كوشەدە ەمىن-ەركىن جۇرەمىن. تانىعاندار اينالىپ وتپەي، امان-ساۋلىق سۇراسىپ جاتادى.
كەيبىرەۋلەر WhatsApp-قا جازىپ، دۇرىس شەشىم قابىلداعانىمدى ايتىپ، قۇپتاپ جاتادى.
ەلدەگى تىنىشتىقتى شايقاپ-توكپەي، سابىرلىق ساقتاعانىم ءۇشىن العىس ايتاتىندار وتە كوپ. ولاردىڭ اراسىندا يگى جاقسىلار دا، كاسىپكەرلەر دە، قاراپايىم ادامدار دا جەتىپ ارتىلادى. ءوزىم دە ايتىپ ءجۇرمىن، ءبىز توڭكەرىس ەمەس، ەۆولوسيانىڭ سوقپاعىمەن ءجۇرۋ كەرەكپىز».
...
«ءدال ءقازىر «نۇر وتانعا» قارسى ازاماتتار ءبىر جاعادان – باس، ءبىر جەڭنەن قول شىعارىپ، ايتىس-تارتىستى دوعارىپ: «جىگىتتەر، بۇل ءبىز ءۇشىن پارلامەنتكە وتەر وڭتايلى ءسات»، – دەگەن ۇراننىڭ توڭىرەگىنە توپتاسۋى كەرەك. مەن بارلىعىن وكپە-رەنىشتى ۇمىتۋعا شاقىرامىن».
دايىنداعان دۋمان بىقاي
