Ol «Feisbýktegi» paraqshasyna arqaly aqyn Juban Moldaǵalievtyń «Men – qazaqpyn» degen óleńiniń alǵashqy shýmaǵyn jazyp qoiypty.
«Men – qazaqpyn myń ólip, myń tirilgen,
Jórgógimde tanystym muń tilimen.
Jylaǵanda júregim kún tutylyp,
Qýanǵanda kúlkimnen tún túrilgen».
Al «Instagram» jelisindegi statýsyna «Sabyr túbi – sary altyn» degen maqaldy jazypty. Osynyń mánisin suraǵanymyzda Djordan: «Men qazaq bolyp týylǵanyma maqtanamyn, – dep jaýap berdi.
– Al «Sabyr túbi – sary altyn» deýimniń syry, men sabyr etsem, týǵan elimdi kóretin kún de alys emes shyǵar dep úmittenemin. Ata-anam meni bir ailyǵymda Qazaqstannan asyrap alǵan eken. Kókshetaýdyń týmasymyn, ózimdi Kishi júzdiń balasy shyǵarmyn dep topshylaimyn. Jalpy, ata-anam meniń qazaq ekenimdi, Qazaqstannan ákelgenderin kishkentai kúnimnen aitatyn. Bólmemde Qazaqstannyń týyn ilip qoiǵanmyn. Ata-anam ony Almatydan alǵandaryn aitady, meni ákeler kezde alǵan bolsa kerek. Sebebi olar Qazaqstanǵa tek bir ǵana ret, meni ákelgen kezderinde ǵana barǵan.
Men 15 – 16 jasymnan ózimniń elim, jerim, ultym týraly oqyp, izdene bastadym. AQSh-ta qazaqtar kóp dep estimin, biraq maǵan jaqyn jerde joq. Internet arqyly tanysqan kaliforniialyq qazaq dostarym bar. Meniń týǵan elim, jerim qandai eken, tezirek kórgim keledi. Sol úshin qazaqsha sóileýdi de úirenip júrmin. Qazaqtyń taǵamdarynyń dámin tatyp kórgen emespin, baýyrsaq, manty jegim, qymyz ishkim keledi. Qazaqtyń qyzyna úilenýdi armandaimyn.
Meniń esimimdi biologiialyq ata-anam Rýstam dep qoiypty. Biraq men ony Rústem dep ózgertkim keledi. Sebebi Rýstam degen esim qazaqshadan góri túrikshege kóbirek uqsaidy. Sonymen qatar familiiamdaǵy «ov» degen oryssha jalǵaýdy alyp tastaǵym keledi. Shynyn aitqanda, Shákenov degen meniń shyn familiiam ba, joq pa, ony da anyq bilmeimin. Eger ózimdi ómirge ákelgen ata-anamdy taba alatyn bolsam, bári anyqtala jatar dep úmittenemin».
Jalpy, Djordan Goldman otbasynda ekinshi perzent eken. Ózinen toǵyz jas úlken ápkesi búginde turmysta, bir qyzy bar. Djordannyń jasy 18-de, ol Mehlville memlekettik joǵary mektebinde tálim alypty. Onda 2000-dai jetkinshek bilim alady.
Negizi A¬Sh-ta aqyly túrde oqytatyn, memlekettik emes mektepter de bar. Onda jetkinshekter mektepte oqyp júrip te jumys istei berýine bolady. Djordan da 14-15 jasynan jumys istei bastaǵan. Eń alǵash ol ydys jýýshy bolǵan, odan keiin kiim satatyn dúkende satýshy bolypty. Al qazir bir mekemede konserj bolyp jumys isteidi. Iaǵni onyń qyzmetine telefon qońyraýlaryna jaýap berý, kerekti meken-jailardy taýyp berý siiaqty qyzmetter kiredi.
Djordannyń aitýynsha, AQSh-ta joǵary oqý oryndarynyń aqysy óte qymbat. Ol Kaliforniiadaǵy kolledjge oqýǵa túsetinin aitady. Biraq qai salada jumys isteitinin áli josparlamaǵan sekildi.
Djordannyń Qazaqstanǵa kelgisi, elin tezirek kórgisi keledi eken. Tipti jolkirege jumsalatyn aqshasyn da jinap qoiypty. Týǵan elin kórýine áke-sheshesi de qarsy emes eken. Tek biyl sáti túspeitinin, sebebi aldaǵy ýaqyttarda ákesimen birge bir jumystarmen Florida shtaty men Londonǵa baratyn kórinedi.
Jat jerde júrse de Djordannyń qazaq bolyp týǵanyma maqtanamyn degen sózi bizdi qatty qýantty. Biz Rústem-Djordannyń elge tezirek kelýine tilektestigimizdi bildirdik.
DEREKKÓZ: zamana.kz
