ول «فەيسبۋكتەگى» پاراقشاسىنا ارقالى اقىن جۇبان مولداعالييەۆتىڭ «مەن – قازاقپىن» دەگەن ولەڭىنىڭ العاشقى شۋماعىن جازىپ قويىپتى.
«مەن – قازاقپىن مىڭ ءولىپ، مىڭ تىرىلگەن،
جورگوگىمدە تانىستىم مۇڭ تىلىمەن.
جىلاعاندا جۇرەگىم كۇن تۇتىلىپ،
قۋانعاندا كۇلكىمنەن ءتۇن تۇرىلگەن».
ال «ينستاگرام» جەلىسىندەگى ستاتۋسىنا «سابىر ءتۇبى – سارى التىن» دەگەن ماقالدى جازىپتى. وسىنىڭ ءمانىسىن سۇراعانىمىزدا دجوردان: «مەن قازاق بولىپ تۋىلعانىما ماقتانامىن، – دەپ جاۋاپ بەردى.
– ال «سابىر ءتۇبى – سارى التىن» دەۋىمنىڭ سىرى، مەن سابىر ەتسەم، تۋعان ەلىمدى كورەتىن كۇن دە الىس ەمەس شىعار دەپ ۇمىتتەنەمىن. اتا-انام مەنى ءبىر ايلىعىمدا قازاقستاننان اسىراپ العان ەكەن. كوكشەتاۋدىڭ تۋماسىمىن، ءوزىمدى كىشى ءجۇزدىڭ بالاسى شىعارمىن دەپ توپشىلايمىن. جالپى، اتا-انام مەنىڭ قازاق ەكەنىمدى، قازاقستاننان اكەلگەندەرىن كىشكەنتاي كۇنىمنەن ايتاتىن. بولمەمدە قازاقستاننىڭ تۋىن ءىلىپ قويعانمىن. اتا-انام ونى الماتىدان العاندارىن ايتادى، مەنى اكەلەر كەزدە العان بولسا كەرەك. سەبەبى ولار قازاقستانعا تەك ءبىر عانا رەت، مەنى اكەلگەن كەزدەرىندە عانا بارعان.
مەن 15 – 16 جاسىمنان ءوزىمنىڭ ەلىم، جەرىم، ۇلتىم تۋرالى وقىپ، ىزدەنە باستادىم. اقش-تا قازاقتار كوپ دەپ ەستيمىن، ءبىراق ماعان جاقىن جەردە جوق. ينتەرنەت ارقىلى تانىسقان كاليفورنيالىق قازاق دوستارىم بار. مەنىڭ تۋعان ەلىم، جەرىم قانداي ەكەن، تەزىرەك كورگىم كەلەدى. سول ءۇشىن قازاقشا سويلەۋدى دە ۇيرەنىپ ءجۇرمىن. قازاقتىڭ تاعامدارىنىڭ ءدامىن تاتىپ كورگەن ەمەسپىن، باۋىرساق، مانتى جەگىم، قىمىز ىشكىم كەلەدى. قازاقتىڭ قىزىنا ۇيلەنۋدى ارماندايمىن.
مەنىڭ ەسىمىمدى بيولوگيالىق اتا-انام رۋستام دەپ قويىپتى. ءبىراق مەن ونى رۇستەم دەپ وزگەرتكىم كەلەدى. سەبەبى رۋستام دەگەن ەسىم قازاقشادان گورى تۇرىكشەگە كوبىرەك ۇقسايدى. سونىمەن قاتار فاميليامداعى «وۆ» دەگەن ورىسشا جالعاۋدى الىپ تاستاعىم كەلەدى. شىنىن ايتقاندا، شاكەنوۆ دەگەن مەنىڭ شىن فاميليام با، جوق پا، ونى دا انىق بىلمەيمىن. ەگەر ءوزىمدى ومىرگە اكەلگەن اتا-انامدى تابا الاتىن بولسام، ءبارى انىقتالا جاتار دەپ ۇمىتتەنەمىن».
جالپى، دجوردان گولدمان وتباسىندا ەكىنشى پەرزەنت ەكەن. وزىنەن توعىز جاس ۇلكەن اپكەسى بۇگىندە تۇرمىستا، ءبىر قىزى بار. دجورداننىڭ جاسى 18-دە، ول مەحلۆيللە مەملەكەتتىك جوعارى مەكتەبىندە ءتالىم الىپتى. وندا 2000-داي جەتكىنشەك ءبىلىم الادى.
نەگىزى ا¬ش-تا اقىلى تۇردە وقىتاتىن، مەملەكەتتىك ەمەس مەكتەپتەر دە بار. وندا جەتكىنشەكتەر مەكتەپتە وقىپ ءجۇرىپ تە جۇمىس ىستەي بەرۋىنە بولادى. دجوردان دا 14-15 جاسىنان جۇمىس ىستەي باستاعان. ەڭ العاش ول ىدىس جۋۋشى بولعان، ودان كەيىن كيىم ساتاتىن دۇكەندە ساتۋشى بولىپتى. ال ءقازىر ءبىر مەكەمەدە كونسەرج بولىپ جۇمىس ىستەيدى. ياعني ونىڭ قىزمەتىنە تەلەفون قوڭىراۋلارىنا جاۋاپ بەرۋ، كەرەكتى مەكەن-جايلاردى تاۋىپ بەرۋ سياقتى قىزمەتتەر كىرەدى.
دجورداننىڭ ايتۋىنشا، اقش-تا جوعارى وقۋ ورىندارىنىڭ اقىسى وتە قىمبات. ول كاليفورنياداعى كوللەدجگە وقۋعا تۇسەتىنىن ايتادى. ءبىراق قاي سالادا جۇمىس ىستەيتىنىن ءالى جوسپارلاماعان سەكىلدى.
دجورداننىڭ قازاقستانعا كەلگىسى، ەلىن تەزىرەك كورگىسى كەلەدى ەكەن. ءتىپتى جولكىرەگە جۇمسالاتىن اقشاسىن دا جيناپ قويىپتى. تۋعان ەلىن كورۋىنە اكە-شەشەسى دە قارسى ەمەس ەكەن. تەك بيىل ءساتى تۇسپەيتىنىن، سەبەبى الداعى ۋاقىتتاردا اكەسىمەن بىرگە ءبىر جۇمىستارمەن فلوريدا شتاتى مەن لوندونعا باراتىن كورىنەدى.
جات جەردە جۇرسە دە دجورداننىڭ قازاق بولىپ تۋعانىما ماقتانامىن دەگەن ءسوزى ءبىزدى قاتتى قۋانتتى. ءبىز رۇستەم-دجورداننىڭ ەلگە تەزىرەك كەلۋىنە تىلەكتەستىگىمىزدى بىلدىردىك.
دەرەككوز: zamana.kz
