Ámirıkanyń Qarjy mınıstrligi Reseıdiń “Rossıa segodná”, RIA Novostı, Russia Today (RT), Sputnik jáne Ruptly medıa toptaryna qarsy sanksıa saldy, dep habarlaıdy Dalanews.kz.
“Kreml AQSH pen Batystyń ulttyq qaýipsizdigi jáne syrtqy saıası múddelerine nuqsan keltirý úshin túrli las quraldardy qoldanady. Olardyń ishinde qoǵamdyq sanaǵa yqpal etý naýqandary men zańsyz kıberqyzmetter bar”, - dep túsindirdi mınıstrlik óz málimdemesinde.
Odan bólek, Qarjy mınıstrliginiń málimetinshe, 2024 jyldyń basynan bastap RT (Russia Today) óziniń yqpal etý kampanıasyn keńeıtý úshin amerıkandyq ınflúenserlerdi (álemjelide aýqymdy aýdıtorıasy bar, halyqtyń kóńil-kúıine áser ete alatyn tulǵa, red.) jasyryn túrde óz qataryna tartýǵa tyrysqan.
Sondaı-aq birqatar atyshýly reseılik propagandıster de sanksıanyń tyrnaǵyna ilikti. Bul qatarda RT bas redaktory Margarıta Sımonán, onyń orynbasarlary Elızaveta Brodskaıa men Anton Anısımov, RT aǵylshyn tilindegi jańalyqtarǵa jaýapty dırektordyń orynbasary Andreı Kıashko, RT sıfrlyq medıa jobasynyń menejeri Konstantın Kalashnıkov jáne RT sıfrlyq medıa jobalarynyń qyzmetkeri Elena Afanaseva kósh bastady. Qala berdi RaHDit basshysy Aleks Garashenko men onyń kómekshileri Anastasıa Ermoshkına men Aleksandr Nejensevke qatysty shekteýler engizildi.
Ámirıkanyń Ádilet mınıstrligi Kalashnıkov pen Afanasevany amerıkalyq aýdıtorıaǵa “Reseı úkimetiniń jasyryn úgit-nasıhaty bar” kontentti jasaýǵa jáne ony taratýǵa qatysy bar dep aıyptady. Vedomstvonyń málimeti boıynsha, olar ınternettegi belsendilermen baılanysyp, áleýmettik jeliler arqyly Reseıdiń nasıhaty men jalǵan aqparatyn taratqany úshin álgilerdiń esep-shotyna 10 mıllıon dollarǵa jýyq qarajat aýdarǵan.
Sondaı-aq qara tizimge “Dıalog” avtonomdy komersıalyq emes uıymy (ANO) jáne onyń bas dırektory Vladımır Tabak, “Dıalog aımaqtary” AUO kirdi. Amerıka Qurama Shtattarynda uıym 2022 jylǵy saılaýǵa yqpal etýge tyrysty jáne Batys úkimetteriniń bedelin túsirýge baǵyttalǵan deepfake (jasandy ıntellekt arqyly adamdardyń beıne jáne dybys jazbasyn ózgertý, red.) pen botofermalar qurdy dep aıyptaldy.
Sonymen birge ANO qyzmetimen baılanysty “rrn.world” domeni tárkilendi.
Buǵan deıin Dalanews Qazaqstanda Kremldiń sózin sóıleıtin áleýmettik medıanyń belsendiligi kúrt artqanyn habarlaǵan bolatyn. Ádette mundaı arnalar men reseıshil blogerler qazaqstandyqtarǵa jany ashyǵandaı keıip tanytyp, túrli problemany kóteredi.
Máselen, kóktemgi sý tasqyny kezinde Astanadaǵy Reseı elshiligi ornalasqan kósheniń atymen atalǵan "Baraeva" telegram-arnasy erekshe kózge túsken. Bul arnanyń jalpy taqyryby JEO apattary nemese eldi mekenderdegi sý tasqyny, eski Qazaqstan ókilderinen muraǵa qalǵan ınfraqurylymdyq daǵdarystarmen kúreste qazaqstandyq bıliktiń álsizdigin kórsetýge baǵyttalǵan bolatyn.
Naqtyraq aıtsaq, avtorlar negatıv jańalyqtardy jarıalap, daǵdarystyń odan ári kúsheıetinin jáne bul áleýmettik shıeleniske ákeletinin aıtady. Al tyǵyryqtan shyǵý úshin Máskeýmen baılanysty kúsheıtý kerek ekenine ekpin beredi.
"Reseıshil telegram arnalar men blogerlerdiń derekterdi qubyltýy jáne jalǵan aqparat taratýy Qazaqstannyń ulttyq qaýipsizdigine úlken qater tóndiredi", - deıdi osy tusta saıasattanýshy Dosym Sátpaev.
