امىريكانىڭ قارجى مينيسترلىگى رەسەيدىڭ “روسسيا سەگودنيا”، ريا نوۆوستي، Russia Today (RT)، Sputnik جانە Ruptly مەديا توپتارىنا قارسى سانكسيا سالدى، دەپ حابارلايدى Dalanews.kz.
“كرەمل اقش پەن باتىستىڭ ۇلتتىق قاۋىپسىزدىگى جانە سىرتقى ساياسي مۇددەلەرىنە نۇقسان كەلتىرۋ ءۇشىن ءتۇرلى لاس قۇرالداردى قولدانادى. ولاردىڭ ىشىندە قوعامدىق ساناعا ىقپال ەتۋ ناۋقاندارى مەن زاڭسىز كيبەرقىزمەتتەر بار”، - دەپ ءتۇسىندىردى مينيسترلىك ءوز مالىمدەمەسىندە.
ودان بولەك، قارجى مينيسترلىگىنىڭ مالىمەتىنشە، 2024 جىلدىڭ باسىنان باستاپ RT (Russia Today) ءوزىنىڭ ىقپال ەتۋ كامپانياسىن كەڭەيتۋ ءۇشىن امەريكاندىق ينفليۋەنسەرلەردى (الەمجەلىدە اۋقىمدى اۋديتورياسى بار، حالىقتىڭ كوڭىل-كۇيىنە اسەر ەتە الاتىن تۇلعا، رەد.) جاسىرىن تۇردە ءوز قاتارىنا تارتۋعا تىرىسقان.
سونداي-اق ءبىرقاتار اتىشۋلى رەسەيلىك پروپاگانديستەر دە سانكسيانىڭ تىرناعىنا ىلىكتى. بۇل قاتاردا RT باس رەداكتورى مارگاريتا سيمونيان، ونىڭ ورىنباسارلارى ەليزاۆەتا برودسكايا مەن انتون انيسيموۆ، RT اعىلشىن تىلىندەگى جاڭالىقتارعا جاۋاپتى ديرەكتوردىڭ ورىنباسارى اندرەي كياشكو، RT سيفرلىق مەديا جوباسىنىڭ مەنەدجەرى كونستانتين كالاشنيكوۆ جانە RT سيفرلىق مەديا جوبالارىنىڭ قىزمەتكەرى ەلەنا افاناسيەۆا كوش باستادى. قالا بەردى RaHDit باسشىسى الەكس گاراششەنكو مەن ونىڭ كومەكشىلەرى اناستاسيا ەرموشكينا مەن الەكساندر نەجەنسيەۆكە قاتىستى شەكتەۋلەر ەنگىزىلدى.
امىريكانىڭ ادىلەت مينيسترلىگى كالاشنيكوۆ پەن افاناسيەۆانى امەريكالىق اۋديتورياعا “رەسەي ۇكىمەتىنىڭ جاسىرىن ۇگىت-ناسيحاتى بار” كونتەنتتى جاساۋعا جانە ونى تاراتۋعا قاتىسى بار دەپ ايىپتادى. ۆەدومستۆونىڭ مالىمەتى بويىنشا، ولار ينتەرنەتتەگى بەلسەندىلەرمەن بايلانىسىپ، الەۋمەتتىك جەلىلەر ارقىلى رەسەيدىڭ ناسيحاتى مەن جالعان اقپاراتىن تاراتقانى ءۇشىن الگىلەردىڭ ەسەپ-شوتىنا 10 ميلليون دوللارعا جۋىق قاراجات اۋدارعان.
سونداي-اق قارا تىزىمگە “ديالوگ” اۆتونومدى كوممەرسيالىق ەمەس ۇيىمى (ANO) جانە ونىڭ باس ديرەكتورى ۆلاديمير تاباك، “ديالوگ ايماقتارى” اۇو كىردى. امەريكا قۇراما شتاتتارىندا ۇيىم 2022 جىلعى سايلاۋعا ىقپال ەتۋگە تىرىستى جانە باتىس ۇكىمەتتەرىنىڭ بەدەلىن تۇسىرۋگە باعىتتالعان deepfake (جاساندى ينتەللەكت ارقىلى ادامداردىڭ بەينە جانە دىبىس جازباسىن وزگەرتۋ، رەد.) پەن بوتوفەرمالار قۇردى دەپ ايىپتالدى.
سونىمەن بىرگە ANO قىزمەتىمەن بايلانىستى “rrn.world” دومەنى تاركىلەندى.
بۇعان دەيىن Dalanews قازاقستاندا كرەملدىڭ ءسوزىن سويلەيتىن الەۋمەتتىك مەديانىڭ بەلسەندىلىگى كۇرت ارتقانىن حابارلاعان بولاتىن. ادەتتە مۇنداي ارنالار مەن رەسەيشىل بلوگەرلەر قازاقستاندىقتارعا جانى اشىعانداي كەيىپ تانىتىپ، ءتۇرلى پروبلەمانى كوتەرەدى.
ماسەلەن، كوكتەمگى سۋ تاسقىنى كەزىندە استاناداعى رەسەي ەلشىلىگى ورنالاسقان كوشەنىڭ اتىمەن اتالعان "بارايەۆا" تەلەگرام-ارناسى ەرەكشە كوزگە تۇسكەن. بۇل ارنانىڭ جالپى تاقىرىبى جەو اپاتتارى نەمەسە ەلدى مەكەندەردەگى سۋ تاسقىنى، ەسكى قازاقستان وكىلدەرىنەن مۇراعا قالعان ينفراقۇرىلىمدىق داعدارىستارمەن كۇرەستە قازاقستاندىق بيلىكتىڭ السىزدىگىن كورسەتۋگە باعىتتالعان بولاتىن.
ناقتىراق ايتساق، اۆتورلار نەگاتيۆ جاڭالىقتاردى جاريالاپ، داعدارىستىڭ ودان ءارى كۇشەيەتىنىن جانە بۇل الەۋمەتتىك شيەلەنىسكە اكەلەتىنىن ايتادى. ال تىعىرىقتان شىعۋ ءۇشىن ماسكەۋمەن بايلانىستى كۇشەيتۋ كەرەك ەكەنىنە ەكپىن بەرەدى.
"رەسەيشىل تەلەگرام ارنالار مەن بلوگەرلەردىڭ دەرەكتەردى قۇبىلتۋى جانە جالعان اقپارات تاراتۋى قازاقستاننىڭ ۇلتتىق قاۋىپسىزدىگىنە ۇلكەن قاتەر توندىرەدى"، - دەيدى وسى تۇستا ساياساتتانۋشى دوسىم ساتپايەۆ.
