“Attan” antiiadrolyq qozǵalysynyń belsendisi Amantai qajy 76 jastaǵy áieldi baspaldaqtan iterip jiberdi degen kúdikke ilindi. Jábirlenýshiniń qyzy Raisa Besqaraǵaeva anasynyń qazirgi jaǵdaiyna qatty alańdaýly ekenin aityp, oqiǵanyń mán-jaiyn baiandady, dep habarlaidy Dalanews.kz.
“Ol bastapqyda kúzetshimen sóilesip turǵan. Sol sátte Amantai qajy kelip, amandasyp, ishke ótpek bolǵan. Anam: «Juma qabyl bolsyn» dep, jolyn berip, aldymen ótkizip jiberedi. Videoǵa qarasaq, ol burylyp, anamdy bar kúshimen iterip jiberedi. Anam baspaldaqtan qulap túsip, qaita tura almady. Eń soraqysy – ol múlde kómektespedi, janyna da jaqyndamady”, – deidi Raisa KTK arnasyna bergen suqbatynda.
Onyń sózinshe, Biǵaisha Bektenbaevanyń densaýlyǵyna aýyr zaqym kelgen.
“Qos jambasyna temir plastina qoiyldy. Anamnyń jasy úlken bolǵandyqtan, bul jaraqat óte aýyr tidi. Qazir ol múlde júre almaidy, tósek tartyp jatyr. Jany qatty qinalyp jatyr. Biz jaqyn arada ońalatynyna úmit artyp otyrmyz. Meniń talabym – kináli adam jaýapqa tartylýy kerek. Saý adamdy múgedekke ainaldyrdy. Mundai adam nelikten qoǵamǵa qaýip tóndirip júrýi tiis?” – deidi ol.
Qazirgi tańda 83 jastaǵy Amantai qajy jýrnalistermen bailanysqa shyqpai, telefon qońyraýlaryna jaýap bermei júr. Belsendiniń ústinen politsiia qylmystyq is qozǵady.
Aita keteiik, jelide taraǵan videoda Amantai-qajy bir ǵimaratqa kirip bara jatady. Sol kezde artynan sóilei, ózimen birge ilese júrgen áieldi ol keýdesinen iterip jiberedi. Áiel ǵimarat esigi aldyndaǵy tabaldyryq baspalaǵynan artqa shalqasynan qulaidy. Onyń jambas súiegi synǵany belgili.
Almaty qalalyq politsiia departamentiniń (PD) baspasóz qyzmeti Almaly aýdanynyń politsiia basqarmasy atalǵan fakti boiynsha qylmystyq is qozǵaǵanyn naqtylady, dep jazady Zakon.kz.
Qazirgi ýaqytta bolǵan oqiǵanyń barlyq mán-jailaryn anyqtaýǵa baǵyttalǵan tergeý jáne protsestik sharalar kesheni júrgizilýde.
"Qajetti sot-meditsinalyq saraptamalar taǵaiyndaldy. Tergeý barysy Almaty politsiiasy basshylyǵynyń baqylaýynda", - deidi Almaty qalalyq politsiia departamentiniń baspasóz qyzmeti.
Buǵan deiin Almaty oblysynda jol ústinde reseilik blogerdi toqtatqan politseidiń basy daýǵa qalǵanyn jazǵan edik.
