Sol sıaqty jas otbasylar arasynda ajyrasýdy azaıtý maqsatynda psıholog shtattaryn bólý de tapsyrylǵan-dy. Oblys ákimi Amandyq Batalovtyń búgin jastarmen qaıtalaı kezdesýinde Jastar jylynyń resmı ashylýynda Memleket basshysy bergen tapsyrmalardyń jergilikti jerlerde oryndalýy týraly másele taqylandy.
Kezdesýdi moderator retinde İ. Jansúgirov atyndaǵy Jetisý memlekettik ýnıversıtetiniń ǵylymı zertteýler qorytyndylaryn komersıalandyrý keńsesiniń dırektory Damır Ogaı júrgizdi.
Jastar atynan stýdentter, sportshylar, qoǵam belsendileri, ár salada eńbek etip júrgen jas mamandar sóz alyp, jetisýlyq jastar barlyq mańyzdy jobalarda bastamashyldyq, kreatıvtilik tanyta alatyndaryn aıtty. Máselen, jas maman Darhan Nurmadıev óz sózinde Semeıde týyp-ósip, Astanadaǵy medısına ýnıversıtetin bitirgenin jáne «Dıplommen aýylǵa» jobasynyń qatysýshysy retinde Jetisý jerine taban tiregenin atap ótti.
– Qazirgi kezde Eskeldi aýdandyq aýrýhanasynda terapevt dáriger bolyp jumys isteımin. Men durys tańdaý jasadym, meniń bilimim men mashyǵym halyqtyń densaýlyǵyn jaqsartýǵa yqpal etip jatqanyna rızamyn. «Dıplommen aýylǵa» jobasy boıynsha aýrýhanada jumys istep júrgen men sıaqty taǵy 8 maman bar. Bárimiz de bir rettik kóterme járdemaqy men turǵyn úı nesıesine kezekte turmyz, aqpan aıynda alamyz dep josparlap otyrmyz. Biz elge paıdamyzdy tıgizgenimizge, al memleket bizge qoldaý kórsetkenine rızamyz, – dedi ol.
Qaratal aýdanyndaǵy «Baqyt-Qaratal» JSHS dırektory Serikjan Jeksembınov óziniń aýyl sharýashylyǵy salasyndaǵy jetistikterimen bólisti. Ol da memleket tarapynan kórsetilgen qoldaý onyń jemisti jumysyna zor yqpal etkenin atap ótti. Tabysty kásipkerlikpen qatar Serikjan – «Týǵan jer» baǵdarlamasynyń belsendi qatysýshylarynyń biri. Onyń Qaratal aýdanyn kórkeıtýge baǵyttalǵan ıgi áreketteri aıtýǵa turarlyq. Ótken jyldyń qorytyndysy boıynsha ol «Jyl mesenaty» nomınasıasynda jeńimpaz atanǵan.
Jazel Dakýbaeva – Taldyqorǵannyń «Jetisý eriktileri» eriktiler qozǵalysynyń belsendi qatysýshysy. Ol óz sózinde barsha jastardy eriktiler qozǵalysyna atsalysýǵa shaqyryp, oblys ákimine oqýda ozat eriktilerdiń joǵary oqý oryndaryna grant bólý máselesin qarastyrýdy surady.
Taldyqorǵan qalasyndaǵy Nazarbaev zıatkerlik mektebi dırektorynyń oqý isi jónindegi orynbasary Vıktor Sosın óńirde İT-tehnologıany damytýǵa barlyq jaǵdaı bar ekenin, oblys basshysynyń jastar úshin İT-startap jobalarynyń tehnoparkin qurý týraly ıdeıasyn qoldaıtynyn jetkizdi.
Jastardy sportpen shuǵyldanýǵa, salamatty ómir saltyn ustanýǵa shaqyrǵan QR bokstan sport sheberi, Álem chempıonatynyń kúmis júldegeri Anel Qudaıbergen oblys basshylyǵynan sporttaǵy daryndy jastardy qoldaýdy surady.
Kezdesý sońynda sóz alǵan oblys ákimi Amandyq Batalov kúni keshe ǵana Astanada Jastar jylyna arnalǵan aýqymdy forým ótkenin, bul jıynda Memleket basshysy jyl kóleminde atqarylýy tıis birqatar mindetterdi aıqyndaǵanyn atap ótti.
– Bul oraıda búgingi kúni oblysta Jastar jylyna arnalǵan «Jetisý jastarynyń jarqyn isteri» jumys jospary daıyndalyp, bekitildi. Alǵashqy kezdesýde sizdermen talqylaǵan usynystardyń júzege asyrylýy jiti baqylaýǵa alynǵan, ol baǵytta naqty jumystar júrgizile bastady. Atap aıtqanda, oblystyń árbir aýdan, qalasynda jastarǵa qyzmet kórsetý ortalyqtary salynady, Taldyqorǵandaǵy JQO bazasynda İT-startap tehnorparki qurylady. Aýyl sharýashylyǵymen aınalysýlary úshin jastar resrýstary ortalyqtaryna 10 gektardan jer beriletin bolyp sheshilgen bolatyn. Sol sıaqty jas otbasylar arasynda ajyrasýdy azaıtý maqsatynda psıholog shtattaryn bólý de qarastyrylady. Oǵan qosa búgingi kezdesýde de birqatar usynystar aıtyldy. Men onyń bárin qaǵazǵa túrtip, oıyma túıip qoıdym. Qaı kezde de jastardan jaqsy ıdeıa týyndap, izgi bastamalar jasalsa, biz qoldaýǵa árqashan daıynbyz, – dedi A. Batalov.
Almaty oblysy ákiminiń baspasóz qyzmeti.
