Almaty oblysy basshysy A. Batalov óz sózinde aldymen Elbasy Nursultan Ábishuly Nazarbaevtyń daralyq qasieti, kóregendik jáne kóshbasshylyq erek qabileti týraly aitty. Elbasynyń dara joly, ómirlik ustanymy men teńdessiz tájiribesi árbir adam úshin úlgi bolatynyn tilge tiek etti.
– Men Tuńǵysh Prezidentimizdiń ózim tánti bolǵan erekshe úsh qasietin jastarǵa únemi aityp júremin. Elbasy – myqty strateg, ol kez kelgen máselege keń aýqymda, keńistik kókjieginen qarai alady. Jáne kez kelgen taqyrypqa tereńnen úńiledi, máseleni jan-jaqty zerttep baryp, sheshim qabyldaidy. Jáne úshinshisi, alysty kóre alatyn, keleshekti boljai biletin kóregendik qasietke ie. Bizdiń jastar Elbasymyzdyń osyndai erek qyrlarynan úlgi alsa, eljandylyq, kóshbasshylyq, daralyq sipattaryn boiyna sińirse deimin, – dei kele oblys basshysy táýelsizdiktiń alǵashqy jyldaryndaǵy qiyn da kúrdeli kezeńderdi eske aldy. Sol jyldardaǵy Elbasynyń batyl sheshimderi, jedel qolǵa alǵan reformalary, halyqpen kezdesip, tildesken sátteri - bári-bári áńgimege tiek boldy.
Oblys basshysy óz sózinde N.Nazarbaevtyń el ekonomikasyn aiaǵynan nyq turǵyzýy, halyqtyń ál-aýqatyn kóterýge baǵyttalǵan kóptegen memlekettik baǵdarlamalar túzip, olardy kezeń-kezeńimen iske asyrýy, jańa astanany salýy, Qazaqstandy syrtqy saiasatta bedeldi memleketke ainaldyrýy, kórshi eldermen dostyq qarym-qatynas ornatýy – osynyń bárin uzaq jyldarǵa jasalǵan úlken strategiialyq jospardyń jemisi ekenin alǵa tartty.
Munan soń oblys basshysy elimizben qatar Almaty oblysynyń da ósip-órkendep kele jatqanyn tilge tiek etti. Jetisý jeri Elbasynyń týǵan jeri ekenin oblys turǵyndary maqtan tutady. Sol mártebe laiyq eńbek etip, jetistikterge jetýge árbir jetisýlyq úles qosyp keledi.
– Saryarqa tórindegi jańa astananyń bas sáýletshisi bolǵan Elbasynyń Almaty oblysynyń ortalyǵyn Taldyqorǵanǵa kóshirý týraly Jarlyq shyǵarýy da erekshe tarihi sheshim boldy. Qazir de Tuńǵysh Prezident eldik maqsat-múddege baǵyttalǵan isterde bizge jol kórsetip, árdaiym qoldaý tanytyp keledi. Sol sebepti de biylǵy jyl koronavirýs indetiniń taralýyna bailanysty qiyndyqtarǵa toly bolǵanyna qaramastan, oblys jyldy jaqsy kórsetkishtermen aiaqtaǵaly otyr. Qazirgi kezde óńir ekonomikasyna 700 mlrd teńgedei investitsiia tartyldy. Jyl sońyna qarai aýyl sharýashylyǵyndaǵy jalpy ónim kólemi 1 trln teńgeden asady. Sonyń nátijesinde halyqtyń ál-aýqaty artyp keledi. Bul – Elbasynyń jáne Prezidentimiz Qasym-Jomart Toqaevtyń eń basty tapsyrmalary, – dep atap ótti A. Batalov.
Jiynǵa qatysqan oblystyq ardagerler keńesiniń tóraǵasy Ermek Kelemseiit, Almaty oblystyq Qazaqstan halqy Assambleiasynyń «Týǵan el» tatar etnomádeni ortalyǵynyń tóraiymy Rýfina Ýsanova jáne «Jastar tańdaýy» qoǵamdyq birlestiginiń jetekshisi Nurlan Rahmetqazynov ta Elbasy kúnine orai quttyqtaý tilekterin jetkizip, jinalǵandarǵa yqylastaryn bildirdi. Elbasynyń salǵan sara jolyn, Prezidentimiz Qasym-Jomart Kemelulynyń alǵa qoiǵan mindetteri men maqsattaryn oryndaýda budan bylai da úles qosatyndyqtaryn jetkizdi.
Saltanatty sharada oblystyń birqatar azamattary óńirdiń áleýmettik-ekonomikalyq damýyna qosqan úlesteri úshin «Qazaqstan Konstitýtsiiasyna 25 jyl», «Qazaqstan halqy Assambleiasyna 25 jyl» merekelik medaldarymen marapattaldy.
Almaty oblysy ákiminiń baspasóz qyzmeti
