Sharanyń jabylý saltanatyna partiianyń Atqarýshy hatshysy Ashat Oralov, QR Qorǵanys ministriniń ókilderi, Parlament depýtattary jáne qarýly kúshterdiń ardagerleri qatysty.
Elimizdiń barlyq óńirindegi 10-11 synyptardyń 1700 oqýshysynyń ishinen iriktelgen 100-den astam finalist eki kún boiy júzýden, kedergiler jolaǵynan ótýden jarysty jáne «Meniń elim – Qazaqstan» taqyrybynda áskeri-tarihi viktorinaǵa qatysty.
Oiynnyń nátijesi boiynsha, birinshi oryndy Mańǵystaý oblysynyń komandasy ielendi. Al ekinshi oryndy Qaraǵandy oblysynyń oqýshylary alsa, úshinshi oryn Shyǵys Qazaqstan oblysynyń komandasyna buiyrdy.
– Bul – jyl sońyna deiin josparlanǵan túrli is-sharalardyń alǵashqysy. «Qaisar» jobasy aiasynda barlyǵy 25 myń jasty qamtý kózdelip otyr. Jalpy, partiiany transformatsiialaý aiasynda jastar qanatyn qaita jandandyrý jumystary qarqyndy júrgizilýde. Ekologiialyq mádenietti qalyptastyrýǵa baǵyttalǵan «TazaLike» jobasy iske qosyldy. Jaqyn arada aýyl jastarynyń áleýetin kóterýge baǵyttalǵan «Órleu» jobasyn júzege asyrý bastalady, – dedi Ashat Oralov.
Sondai-aq, partiianyń Atqarýshy hatshysy áskeri qyzmetshiler men armiia ardagerlerin Qazaqstan Respýblikasy Qarýly Kúshteriniń qurylǵanyna 30 jyl tolýymen quttyqtady. Ol Memleket basshysy Qasym-Jomart Toqaev elimizdiń táýelsizdigi men ulttyq múddesin qorǵap turǵan, áskeri antyna adal patriottardy qoldaýǵa erekshe nazar aýdaratynyn atap ótti.
– Bizdiń sarbazdar TMD elderi qarýly kúshteri arasynda úzdikter qatarynda. Oǵan áskeri qyzmetshilerdiń jyl saiynǵy túrli halyqaralyq oqý-jattyǵýlarǵa qatysýy men armiia oiyndaryndaǵy jeńisteri dálel bola alady. Bolashaqta el táýelsizdigin tuǵyrly etetin ol – búgingi jastar. Olardyń áskerge degen qyzyǵýshylyǵyn arttyratyn osyndai «Qaisar» siiaqty jobalardyń mańyzy óte zor, – dedi jiynnyń jabylý saltanatynda QR Qorǵanys ministriniń birinshi orynbasary Marat Qusaiynov.
Halyq qaharmany, general-leitenant Baqytjan Ertaev joba qatysýshylaryna jaýyngerlik erlikterdiń tarihy týraly aityp berdi. Ol jastardy patriot bolýǵa shaqyryp, Otan qorǵaýdan artyq mamandyq joq ekenine toqtaldy.
Esterińizge sala keteiik, partiianyń jastar qanaty «Qaisar» áskeri-patriottyq jobasyn iske qosatyny týraly osy jyly 1 naýryzda ótken «AMANAT» partiiasynyń kezekten tys XXII sezi barysynda aitqan bolatyn.
