شارانىڭ جابىلۋ سالتاناتىنا پارتيانىڭ اتقارۋشى حاتشىسى اسحات ورالوۆ، ق ر قورعانىس ءمينيسترىنىڭ وكىلدەرى، پارلامەنت دەپۋتاتتارى جانە قارۋلى كۇشتەردىڭ ارداگەرلەرى قاتىستى.
ەلىمىزدىڭ بارلىق وڭىرىندەگى 10-11 سىنىپتاردىڭ 1700 وقۋشىسىنىڭ ىشىنەن ىرىكتەلگەن 100-دەن استام فيناليست ەكى كۇن بويى جۇزۋدەن، كەدەرگىلەر جولاعىنان وتۋدەن جارىستى جانە «مەنىڭ ەلىم – قازاقستان» تاقىرىبىندا اسكەري-تاريحي ۆيكتوريناعا قاتىستى.
ويىننىڭ ناتيجەسى بويىنشا، ءبىرىنشى ورىندى ماڭعىستاۋ وبلىسىنىڭ كومانداسى يەلەندى. ال ەكىنشى ورىندى قاراعاندى وبلىسىنىڭ وقۋشىلارى السا، ءۇشىنشى ورىن شىعىس قازاقستان وبلىسىنىڭ كومانداسىنا بۇيىردى.
جەڭىمپازداردى ماراپاتتاعان «AMANAT» پارتياسىنىڭ اتقارۋشى حاتشىسى اسحات ورالوۆ جوبانىڭ باستى ماقساتى – جاستاردىڭ بويىندا پاتريوتتىق سانانى جانە اسكەري قىزمەتكە دەگەن قىزىعۋشىلىقتى قالىپتاستىرۋ ەكەنىن اتاپ ءوتتى.
– بۇل – جىل سوڭىنا دەيىن جوسپارلانعان ءتۇرلى ءىس-شارالاردىڭ العاشقىسى. «Qaisar» جوباسى اياسىندا بارلىعى 25 مىڭ جاستى قامتۋ كوزدەلىپ وتىر. جالپى، پارتيانى ترانسفورماسيالاۋ اياسىندا جاستار قاناتىن قايتا جانداندىرۋ جۇمىستارى قارقىندى جۇرگىزىلۋدە. ەكولوگيالىق مادەنيەتتى قالىپتاستىرۋعا باعىتتالعان «TazaLike» جوباسى ىسكە قوسىلدى. جاقىن ارادا اۋىل جاستارىنىڭ الەۋەتىن كوتەرۋگە باعىتتالعان «Órleu» جوباسىن جۇزەگە اسىرۋ باستالادى، – دەدى اسحات ورالوۆ.
سونداي-اق، پارتيانىڭ اتقارۋشى حاتشىسى اسكەري قىزمەتشىلەر مەن ارميا ارداگەرلەرىن قازاقستان رەسپۋبليكاسى قارۋلى كۇشتەرىنىڭ قۇرىلعانىنا 30 جىل تولۋىمەن قۇتتىقتادى. ول مەملەكەت باسشىسى قاسىم-جومارت توقايەۆ ەلىمىزدىڭ تاۋەلسىزدىگى مەن ۇلتتىق مۇددەسىن قورعاپ تۇرعان، اسكەري انتىنا ادال پاتريوتتاردى قولداۋعا ەرەكشە نازار اۋداراتىنىن اتاپ ءوتتى.
– ءبىزدىڭ ساربازدار تمد ەلدەرى قارۋلى كۇشتەرى اراسىندا ۇزدىكتەر قاتارىندا. وعان اسكەري قىزمەتشىلەردىڭ جىل سايىنعى ءتۇرلى حالىقارالىق وقۋ-جاتتىعۋلارعا قاتىسۋى مەن ارميا ويىندارىنداعى جەڭىستەرى دالەل بولا الادى. بولاشاقتا ەل تاۋەلسىزدىگىن تۇعىرلى ەتەتىن ول – بۇگىنگى جاستار. ولاردىڭ اسكەرگە دەگەن قىزىعۋشىلىعىن ارتتىراتىن وسىنداي «Qaisar» سياقتى جوبالاردىڭ ماڭىزى وتە زور، – دەدى جيىننىڭ جابىلۋ سالتاناتىندا ق ر قورعانىس ءمينيسترىنىڭ ءبىرىنشى ورىنباسارى مارات قۇسايىنوۆ.
حالىق قاھارمانى، گەنەرال-لەيتەنانت باقىتجان ەرتايەۆ جوبا قاتىسۋشىلارىنا جاۋىنگەرلىك ەرلىكتەردىڭ تاريحى تۋرالى ايتىپ بەردى. ول جاستاردى پاتريوت بولۋعا شاقىرىپ، وتان قورعاۋدان ارتىق ماماندىق جوق ەكەنىنە توقتالدى.
– بىزگە اسكەري بولىمدە ارنايى ەكسكۋرسيا وتكىزىپ، قارۋ-جاراق تۇرلەرىمەن تانىستىردى. «Qaisar» ديالوگ الاڭى اياسىندا وفيسەرلەر اسكەري ءومىردىڭ قىر-سىرىنا قاتىستى بارلىق سۇراقتارىمىزعا جاۋاپ بەردى. وسى جوبانىڭ ارقاسىندا بارلىق قاتىسۋشىلار شىن مانىندە ءبىر-بىرىن جاقىن تارتىپ، وزدەرىنە ەلىمىزدىڭ تۇكپىر-تۇكپىرىنەن جاڭا دوستار تاپتى، – دەپ ءوز اسەرىمەن ءبولىستى تۇركىستان وبلىسىنان كەلگەن قاتىسۋشى ءادىل انارباي.
ەستەرىڭىزگە سالا كەتەيىك، پارتيانىڭ جاستار قاناتى «Qaisar» اسكەري-پاتريوتتىق جوباسىن ىسكە قوساتىنى تۋرالى وسى جىلى 1 ناۋرىزدا وتكەن «AMANAT» پارتياسىنىڭ كەزەكتەن تىس XXII سەزى بارىسىندا ايتقان بولاتىن.
