Jańaqala aýdany Qyrqopa aýyly S.Meńdeshev aýyldyq okrýgindegi mádeniet úii birneshe jyl boiy apattyq jaǵdaida jumys jasap keldi. Aýyl turǵyndarynyń árkez kóteretin máseleleriniń qatarynda mádeniet úiiniń kúrdeli jóndeý máselesi boldy. 2024 jyly «AMANAT» partiiasynyń bastamasymen aýylda jańa mádeniet úii qurylysy bastalyp, qazirgi tańda tolyq paidalanýǵa berildi, dep habarlaidy dalanews.kz.
Batys Qazaqstan oblysynyń Jańaqala aýdany óńirdiń kúi astanasy bolyp sanalady. Bul kieli aýmaqta qazaqtyń kúi ónerin asqaqtatqan ataqty kúi alyptary Qurmanǵazy Saǵyrbaiuly men Dina Nurpeiisova dúniege kelgen. Oqap Qabiǵojin, Mamen, Tuiaqberdi Shámelov, Qali Jantileýov syndy ataqty kúishiler de osy kieli jerdiń tarlandary.
150 orynǵa arnalǵan jańa mádeniet úii barlyq zamanaýi qural-jabdyqtarmen jabdyqtalǵan. Mádeniet úii aýmaǵynda balalarǵa arnalǵan kovorking zaly, bi zaly jáne kitaphana ornalasqan.
Aýyldyq okrýgtegi jańa mádeni nysanda aýyl turǵyndary mádeni-kópshilik is-sharalar, jinalystar, kontserttik baǵdarlamalar uiymdastyrýǵa múmkindik alyp otyr.
- «Bizdiń aýylymyzdaǵy mádeniet úii uzaq ýaqyt apatty jaǵdaida jumys jasap keldi. Aýyldyń jastary da, mektep oqýshylary talantty, ár túrli baiqaýlarǵa qatysyp júr. 2024 jyly aýylymyzda jańa mádeniet úii salynyp, aýyl turǵyndarynyń bir amanaty oryndaldy. Aýyl turǵyndary atynan, mádeniet salasy qyzmetkerleri atynan «AMANAT» partiiasyna bastamashy bolǵany úshin alǵysymyzdy bildiremiz,– deidi S.Meńdeshev atyndaǵy aýyl turǵyndary.
Atalǵan mádeni nysan tek jastarǵa ǵana emes, barlyq jastaǵy aýyl turǵyndaryna arnalǵan. Joba aiasynda qurylys jumystarynyń sapasyna erekshe kóńil bólinip, tiisti baqylaý júrgizilgen.
- «Jańaqala aýdany aýmaǵynda partiianyń sailaýaldy baǵdarlamasy aiasynda birqatar mádeni nysandar boi kóterip, birqataryna kúrdeli jóndeý jumystary júrgizildi. Belgili memleket jáne qoǵam qairatkeri Seiitqali Meńdeshev atyndaǵy aýyl turǵyndarynyń amanaty – mádeniet úiiniń qurylys jumystary sátti aiaqtaldy», - dedi aýdandyq partiia filialynyń atqarýshy hatshysy Gúlbaný Dagarova.
Aita keteiik, Batys Qazaqstan oblysynda 2023 jyldan beri jalpy syiymdylyǵy 690 oryndyq 6 mádeniet nysany ashylyp, 12 nysanǵa kúrdeli jóndeý júrgizilip, paidalanýǵa berildi.
