Qaraǵandy oblysyndaǵy "Recycling Sompany" JShS zaýytynda múlikti túgendeý kerek bolǵan sot oryndaýshylary kásiporynǵa kire almai qoiǵan. Áliia Nazarbaevaǵa qatysy bar "ÓKM operatorynyń" isi boiynsha bul zaýyt memleket paidasyna tárkilenýi kerek bolǵan, - dep habarlaidy Dalanews.kz.
Qoǵam belsendisi Jarqyn Kúrentaevtyń sózinshe, 2023 jylǵy shildede Astana soty shyǵarǵan ÓKM operatorynyń top-menedjerlerine qatysty úkimge sáikes, "Recycling Company" JShS esepshotyndaǵy qarajat, sondai-aq kásiporynnyń ózi memleket paidasyna tárkilengen. Zaýyt Qaraǵandy oblysyndaǵy Doskei aýylynda ornalasqan jáne eski kólikterdi qaita óńdeýmen ainalysady.
Biyl aqpannyń sońynda kompaniiaǵa qatysty atqarýshylyq óndiris bastaldy. Sot oryndaýshylary kásiporynǵa túgendeý jumystaryn júrgizý úshin kelgenimen, olardyń zaýytqa kirýine birneshe kún buryn kúzetshiler kedergi keltirgen.
"Memlekettik sot oryndaýshylary múlikti túgendeý jáne sot úkiminde kózdelgen basqa da qajetti qyzmetti júzege asyrý úshin zaýytqa kire almaǵan. Olardyń aitýynsha, Áliia Nazarbaeva hanym zaýytta qaýipsizdikti kúsheitken. Al olardyń zańdy talaptaryna qaramastan, kúzetshiler olardy ishke kirgizbei qoidy. Osydan keiin sot oryndaýshylary prokýratýramen aldaǵy is-áreketterin anyqtaý úshin Qaraǵandyǵa oraldy. Prokýratýra ókili jaǵdaidy qarap shyǵýǵa ýáde berdi", - deidi Jarqyn Kúrentaev Orda.kz-ke.
Kúrentaevtyń aitýynsha, zaýytty tárkileýge naqty kim kedergi keltirgeni belgisiz. Biraq kelesi joly sot oryndaýshylar kásiporynǵa SOBR sarbazdarymen birge barmaq - prokýratýra sot oryndaýshylaryna qoldaý kórsetýge ýáde bergen. Kompaniianyń múlkin tárkileý sharalary keiinge qaldyrylyp, endi 1 nemese 4 naýryzda ótedi dep josparlanyp otyr.
Aita keteiik, buǵan deiin Áliia Nazarbaeva men Konstitýtsiialyq Keńestiń burynǵy basshysy Valentina Rogovaǵa "reiderlik shabýyl jasady" degen aiyp taǵylǵan bolatyn.
"2003 jyly (Nazarbaeva – QazTAG) óz ústemdigin paidalana otyryp, quny 170 million dollardy quraityn (2003 jylǵy esep boiynsha) jeti munai bazasy men 96 janarmai quiý beketinen turatyn kásiporyndy qoldy etken. Al burynǵy ielerin "túrmege qamap, dene jaraqatyn salamyn" dep qorqytqan. Tipti tapa tal túste kásip ieleriniń biriniń ákesin ashyq túrde urlap áketken. Bul óziniń yqpalyn kórsetý úshin jasalǵan áreket.
Kýágerlerdiń aitýynsha, adam urlaýǵa quqyq qorǵaý organdarynyń qatysy bolýy múmkin. Qylmysqa sybailas qatysýshy Valentina Rogova bolǵan.
Ol - Qazaqstan Respýblikasy Konstitýtsiialyq Keńesiniń Tóraǵasy, Prezidenttiń kómekshisi, Prezidenttiń keńesshisi jáne basqa da kóptegen memlekettik qyzmetterdi atqarǵan Igor Ivanovich Rogovtyń áieli", - delingen Ulttyq baspasóz klýbynyń habarlamasynda.
