قاراعاندى وبلىسىنداعى "Recycling سompany" ج ش س زاۋىتىندا مۇلىكتى تۇگەندەۋ كەرەك بولعان سوت ورىنداۋشىلارى كاسىپورىنعا كىرە الماي قويعان. ءاليا نازاربايەۆاعا قاتىسى بار "وكم وپەراتورىنىڭ" ءىسى بويىنشا بۇل زاۋىت مەملەكەت پايداسىنا تاركىلەنۋى كەرەك بولعان، - دەپ حابارلايدى Dalanews.kz.
قوعام بەلسەندىسى جارقىن كۇرەنتايەۆتىڭ سوزىنشە، 2023 جىلعى شىلدەدە استانا سوتى شىعارعان وكم وپەراتورىنىڭ توپ-مەنەدجەرلەرىنە قاتىستى ۇكىمگە سايكەس، "Recycling Company" ج ش س ەسەپشوتىنداعى قاراجات، سونداي-اق كاسىپورىننىڭ ءوزى مەملەكەت پايداسىنا تاركىلەنگەن. زاۋىت قاراعاندى وبلىسىنداعى دوسكەي اۋىلىندا ورنالاسقان جانە ەسكى كولىكتەردى قايتا وڭدەۋمەن اينالىسادى.
بيىل اقپاننىڭ سوڭىندا كومپانياعا قاتىستى اتقارۋشىلىق ءوندىرىس باستالدى. سوت ورىنداۋشىلارى كاسىپورىنعا تۇگەندەۋ جۇمىستارىن جۇرگىزۋ ءۇشىن كەلگەنىمەن، ولاردىڭ زاۋىتقا كىرۋىنە بىرنەشە كۇن بۇرىن كۇزەتشىلەر كەدەرگى كەلتىرگەن.
"مەملەكەتتىك سوت ورىنداۋشىلارى مۇلىكتى تۇگەندەۋ جانە سوت ۇكىمىندە كوزدەلگەن باسقا دا قاجەتتى قىزمەتتى جۇزەگە اسىرۋ ءۇشىن زاۋىتقا كىرە الماعان. ولاردىڭ ايتۋىنشا، ءاليا نازاربايەۆا حانىم زاۋىتتا قاۋىپسىزدىكتى كۇشەيتكەن. ال ولاردىڭ زاڭدى تالاپتارىنا قاراماستان، كۇزەتشىلەر ولاردى ىشكە كىرگىزبەي قويدى. وسىدان كەيىن سوت ورىنداۋشىلارى پروكۋراتۋرامەن الداعى ىس-ارەكەتتەرىن انىقتاۋ ءۇشىن قاراعاندىعا ورالدى. پروكۋراتۋرا وكىلى جاعدايدى قاراپ شىعۋعا ۋادە بەردى"، - دەيدى جارقىن كۇرەنتايەۆ Orda.kz-كە.
كۇرەنتايەۆتىڭ ايتۋىنشا، زاۋىتتى تاركىلەۋگە ناقتى كىم كەدەرگى كەلتىرگەنى بەلگىسىز. ءبىراق كەلەسى جولى سوت ورىنداۋشىلار كاسىپورىنعا سوبر ساربازدارىمەن بىرگە بارماق - پروكۋراتۋرا سوت ورىنداۋشىلارىنا قولداۋ كورسەتۋگە ۋادە بەرگەن. كومپانيانىڭ مۇلكىن تاركىلەۋ شارالارى كەيىنگە قالدىرىلىپ، ەندى 1 نەمەسە 4 ناۋرىزدا وتەدى دەپ جوسپارلانىپ وتىر.
ايتا كەتەيىك، بۇعان دەيىن ءاليا نازاربايەۆا مەن كونستيتۋسيالىق كەڭەستىڭ بۇرىنعى باسشىسى ۆالەنتينا روگوۆاعا "رەيدەرلىك شابۋىل جاسادى" دەگەن ايىپ تاعىلعان بولاتىن.
"2003 جىلى (نازاربايەۆا – قازتاگ) ءوز ۇستەمدىگىن پايدالانا وتىرىپ، قۇنى 170 ميلليون دوللاردى قۇرايتىن (2003 جىلعى ەسەپ بويىنشا) جەتى مۇناي بازاسى مەن 96 جانارماي قۇيۋ بەكەتىنەن تۇراتىن كاسىپورىندى قولدى ەتكەن. ال بۇرىنعى يەلەرىن "تۇرمەگە قاماپ، دەنە جاراقاتىن سالامىن" دەپ قورقىتقان. ءتىپتى تاپا تال تۇستە كاسىپ يەلەرىنىڭ ءبىرىنىڭ اكەسىن اشىق تۇردە ۇرلاپ اكەتكەن. بۇل ءوزىنىڭ ىقپالىن كورسەتۋ ءۇشىن جاسالعان ارەكەت.
كۋاگەرلەردىڭ ايتۋىنشا، ادام ۇرلاۋعا قۇقىق قورعاۋ ورگاندارىنىڭ قاتىسى بولۋى مۇمكىن. قىلمىسقا سىبايلاس قاتىسۋشى ۆالەنتينا روگوۆا بولعان.
ول - قازاقستان رەسپۋبليكاسى كونستيتۋسيالىق كەڭەسىنىڭ ءتوراعاسى، پرەزيدەنتتىڭ كومەكشىسى، پرەزيدەنتتىڭ كەڭەسشىسى جانە باسقا دا كوپتەگەن مەملەكەتتىك قىزمەتتەردى اتقارعان يگور يۆانوۆيچ روگوۆتىڭ ايەلى"، - دەلىنگەن ۇلتتىق باسپا ءسوز كلۋبىنىڭ حابارلاماسىندا.
