Aqtóbede Áliia Moldaǵulovanyń 100 jyldyǵyna arnalǵan «Ǵasyrlarǵa jalǵasqan erlik» forýmy ótti,- dep habarlaidy Dalanews.kz
Forýmǵa qatysý úshin Reseiden jáne Qazaqstannyń ártúrli óńirlerinen delegatsiialar keldi. Bul shara mereitoilyq jyldyń eń mańyzdy oqiǵalarynyń biri retinde atap ótildi.
Forýmnyń maqsaty — batyrlyqtyń, Otanǵa degen súiispenshilik pen patriotizmniń simvolyna ainalǵan mergen qyzdyń rýhyna taǵzym etý. Sharaǵa memlekettik jáne qoǵam qairatkerleri, Qazaqstan Respýblikasy Parlamentiniń Senaty men Májilisiniń depýtattary, mádeniet jáne ǵylym salasynyń ókilderi, sondai-aq batyrdyń týystary qatysty.
Qazaqstan Respýblikasy Prezidentiniń keńesshisi Málik Otarbaev Memleket basshysy atynan forýmǵa qatysýshylar men aqtóbelikterdi osy mańyzdy tarihi oqiǵamen quttyqtady.
«Áliia Moldaǵulova – búkil qazaq halqynyń maqtanyshy, qaisar rýh pen janqiiarlyqtyń simvoly. Búgingi forým – tarihi jadymyzdy saqtaý men jas urpaqty patriottyq rýhta tárbieleý jolyndaǵy ortaq jaýapkershiligimizdiń kórinisi. Forýmdy uiymdastyrǵan barsha azamattarǵa, Áliia Moldaǵulovanyń erligin urpaq jadynda máńgi qaldyrýǵa atsalysyp júrgen jandarǵa shynaiy alǵysymdy bildiremin. Sizder jastardy Otanǵa degen súiispenshilikke, ulttyq qundylyqtarǵa adaldyqqa baýlyp kelesizder», – dedi Prezident keńesshisi.
Sharaǵa qatysýshylardy Aqtóbe oblysynyń ákimi Ashat Shaharov ta quttyqtap, batyr esimin ulyqtaý baǵytynda óńirde júzege asyp jatqan jumystar týraly aityp ótti. Atap aitqanda, Aqtóbe qalasynda jańa mádeniet ortalyǵy men memorialdyq mýzei salynyp jatyr, sondai-aq Áliia aýylynda infraqurylym damyp keledi.
Ashat Shaharov óz sózinde pedagog ári qoǵam qairatkeri, Áliianyń erligin zertteýge jáne jastarǵa rýhani-adamgershilik tárbie berýge ómirin arnaǵan Ǵalymjan Baiderbestiń eńbegin erekshe atap ótti.
Forým barysynda Áliia Moldaǵulovanyń erligine, tarihi jadyny saqtaý jolyndaǵy zertteýshiler men qoǵam belsendileriniń úlesine, sondai-aq mýzeilik jáne mádeni jobalardyń patriottyq tárbiedegi róline arnalǵan mazmundy baiandamalar tyńdaldy. Sóz alǵandar qatarynda – ǵylym ókilderi, mýzei qyzmetkerleri, batyrdyń týystary men arnaiy shaqyrylǵan qonaqtar boldy.
Iaroslavl oblysyndaǵy «Viatich» patriottyq ortalyǵynyń jetekshisi Liýbov Abramova Viatskoe aýylynda batyr qyzdyń rýhyna degen qurmet erekshe ekenin aityp ótti. 1942 jyly Áliia Moldaǵulova Leningrad qorshaýynan evakýatsiialanǵan balalarmen birge Viatskoe aýylyna jetkizilgen edi.
«Biz Iaroslavl oblysy Viatskoe aýylynan keldik. Óńirlerimizdi eki myń shaqyrymdai qashyqtyq bólgenimen, Áliia Moldaǵulovanyń esimi bizdi berik bailanystyryp tur. Iaroslavl jerinde onyń esimi zor qurmetpen atalady: Batyrlyq memorialynda esimi qashalyp jazylǵan, aýyl mektebinde qujattar men fotosýretter qoiylǵan arnaiy mýzei ashylǵan. 1942 jyly Áliia bizdiń mektebimizde 7-synypta oqydy, sondyqtan biz ony zor maqtanyshpen ózimizdiń túlek dep ataimyz. Viatskoe aýylyna kelgen árbir týrist Áliianyń erligi jaily biledi. Onyń beinesi aýylymyzdyń mádeni-tarihi ómiriniń ajyramas bólshegine ainaldy», – dedi Liýbov Abramova.
Shara sońynda halyq mahabbaty men alǵysyna bólengen, 50 jyldyq tarihy bar «Áliia» áni shyrqaldy. Ándi sahnada ánshi Merei Samurat tebirene oryndap, kórermenderdiń zor qoshemetin ielendi.
Forým – urpaqtar sabaqtastyǵynyń, tájiribe almasýdyń jáne Áliia Moldaǵulovanyń erligin ulttyq tarih pen maqtanyshtyń ajyramas bóligi retinde dáripteýdiń mańyzdy alańyna ainaldy.
