Nazarbaev rejimine qyzmet etip, artynsha bilikpen til tabysa almai oppozitsiia jaǵyna shyqqan saiasi tulǵalardyń Qazaqstanda azamattyq qoǵamdyq qurýshy, demokratiianyń jankúieri dep kesip aitýǵa bolmaidy. Sońǵy ýaqyttary qazaq qoǵamy bul máselege qaita oralyp, elimizdiń aqparattyq keńistiginde keńinen talqylaýda.
Osydan birshama ýaqyt buryn belgili jýrnalist Qasym Amanjol Zamanbek Nurqadilovty demokrat adam dep aita almaitynyn ashyp aitqan edi.
Taiaýda «Múmkin emes» arnasyna suhbat bergen taǵy bir jýrnalist Bigeldi Ǵabdýllin qazaq qoǵamynda oppozitsiialyq saiasatker retinde tanylǵan saiasi tulǵa, marqum Altynbek Sársenbaevtyń qanshalyqty demokrat bolǵanyn aityp, aidy aspannan biraq shyǵardy.
Bigeldi Ǵabdýlin kezinde ózi ashqan «Novoe pokolenie» basylymyn Altynbek Sársenbaev ákimshilik resýrstyń kúshimen tartyp alyp, Rahat Álievtiń atyna qalai jazyp bergenin áńgimelep berdi.
– Búginde biraz Altynbek Sársenbaevty «naǵyz demokrat» dep jer-kókke syiǵyzbai maqtaimyz ǵoi. Shyndyǵynda ol eshqandai da demokrat bolǵan emes. Qaita elimizdegi táýelsiz basylymdardy tunshyqtyrýshylardyń biri boldy. Ol ómiriniń sońǵy kezinde ǵana oppozitsiia qataryna ótip, demokrat atandy. Al qolynda biligi bolǵanda elimizdegi basylymdardy baqylaýda ustap, basyp-janshydy. Tipti, bul jaiynda aitarǵa sózim joq.
Ol jekemenshik gazetterdi memleketke qaitarýdyń túrli joldaryn oilap tapty. Aitalyq, ol menen «Novoe pokolenie» gazetin alyp qoiýda barlyq aila-sharasyn istep baqty. Sol kezdegi aqparat salasyna jaýapty ministrliktiń ataýy ózgergende «Bizdiń ministrliktiń ataýy ózgerdi, endi barlyq gazetter tikelei ministrlikke baǵynyshty bolýy kerek. Gazetińizdi bizge berýińiz kerek» dep orynsyz talap qoidy.
Osylaisha «Novoe pokolenie» gazetiniń 49% aktsiiasyn alyp aldy. Sol kezde Májiliste otyryp, bizge arasha túsken Sherhan Murtaza men Altynshash Jaǵanovanyń sózine pysqyryp ta qaraǵan joq.
Arada bes jyl ótkennen keiin taǵy habarlasyp, «Bizder gazetti tolyqtai óz baqylaýymyzǵa alatyn boldyq» dep basylymdy tolyqtai ieligine alyp, artynsha «Novoe pokolenie» basylymyn Nazarbaevtyń úlken kúieý balasy Rahat Álievtiń atyna jazyp berdi. Eger Altynbek Sársenbaev sóz bostandyǵynyń jaqtaýshysy bolsa, osyndai qadamǵa barar ma edi? – dep Bigeldi Ǵabdýllin syryn aitypty.
Iá, Altekeńniń kezinde ministrlik tarapynan aqparat quraldaryna baqylaý kúshti bolǵany jasyryn emes. Muny jýrnalister qaýymy jaqsy biledi.
