Qazaqstan Ishki ister ministrligi Qazaqstan, Grýziia jáne Túrkiia aýmaǵynda áreket etken transulttyq uiymdasqan qylmystyq topqa (UQT) qarsy aýqymdy arnaiy operatsiianyń nátijesin jariialady, dep habarlaidy dalanews.kz.
Vedomstvo málimetinshe, halyqaralyq áriptestik aiasynda júrgizilgen úilestirilgen is-sharalar barysynda birneshe aýyr qylmystyń beti ashylyp, qylmystyq toptyń músheleri ustalǵan.
Almatydaǵy qastandyq pen Ystambuldaǵy kisi óltirý isi áshkerelendi
IIM málimetine sáikes, halyqaralyq yntymaqtastyqtyń kúsheiýine Qazaqstan delegatsiialarynyń Grýziia, Túrkiia jáne Ázerbaijanǵa jasaǵan jumys saparlary yqpal etken. Úsh eldiń quqyq qorǵaý organdarynyń birlesken jumysy nátijesinde Ystanbulda jasalǵan kisi óltirý qylmysy ashyldy.
Tergeý barysynda Qazaqstan azamaty Ismailovtyń Ystanbulda tapanshamen atylyp óltirilgeni anyqtaldy. Qazaqstan, Túrkiia jáne Grýziia politsiiasy osy qylmysty oryndady degen kúdikpen eki adamdy ustady.
Tergeýshiler qylmystyń sebebin, sondai-aq ony uiymdastyrýshy men tapsyrys berýshini anyqtaǵan. Olar halyqaralyq qylmystyq orta ókilderi bolyp shyqqan.
Almatyda killer ustaldy
Jedel aqparattardy taldaý barysynda IIM men Ulttyq qaýipsizdik komitetiniń qyzmetkerleri Qazaqstan aýmaǵynda jasalǵan ózge de qylmystardyń izin anyqtaǵan. Tergeý málimetine sáikes, ustalǵandar transulttyq uiymdasqan qylmystyq toptyń quramynda bolǵan. Bul topty AQSh-ta jýrnalisti óltirýge oqtalý isi boiynsha sottalyp, qazir túrmede jazasyn ótep jatqan qylmystyq bedel basqarǵan.
Almatyda arnaiy operatsiia barysynda atalǵan toptyń killeri ustaldy. Tergeý nusqasyna sáikes, ol 2025 jyldyń tamyz aiynda Almaty turǵynyna jasalǵan qastandyq áreketine qatysqan. Sonymen qatar arnaiy jasaq osy qylmystyq qurylymnyń ózge múshelerin de qolǵa túsirdi.
Grýziiada da kúdiktiler ustaldy
Grýziia aýmaǵynda da transulttyq uiymdasqan qylmystyq toptarmen bailanysy bar jáne birneshe aýyr qylmysqa qatysy bar degen kúdikke ilingen adamdar ustaldy. Qazirgi ýaqytta quqyq qorǵaý organdary qylmystyq toptyń basqa da múshelerin anyqtaý jáne olardyń ózge qylmystarǵa qatystylyǵyn tekserý jumystaryn jalǵastyryp jatyr.
