Almatyda Qazaqstan men Qytai arasyndaǵy saýda-ekonomikalyq yntymaqtastyqty keńeitýge arnalǵan aýqymdy investitsiialyq forým ótedi. Jiynǵa Prezident Qasym-Jomart Toqaev, 600-den astam delegat jáne Qytaidyń 200-den asa iri kompaniiasynyń ókili qatysady dep josparlanyp otyr, dep habarlaidy dalanews.kz.
Forým alańynda Qytaidyń jetekshi korporatsiialary, qazaqstandyq kásipkerler, memlekettik organdar men damý institýttarynyń basshylary bas qosady. Taraptar investitsiialyq jobalardy júzege asyrý, óndiristi jergiliktendirý jáne ózara saýdany ulǵaitý múmkindikterin talqylaidy.
Iskerlik kezdesý eki el arasyndaǵy ekonomikalyq bailanystyń qarqyndy damyp jatqan kezeńinde ótkeli otyr. Byltyr Qazaqstan men Qytaidyń taýar ainalymy 48,7 milliard dollarǵa jetti. Al Qytaidan tartylǵan tikelei investitsiia kólemi 2,8 milliard dollar bolyp, rekordtyq kórsetkish tirkeldi.
Forým aiasynda taraptar 45-ke jýyq kommertsiialyq qujat almasýdy josparlap otyr. Sonymen birge investitsiialyq jobalar kórmesi uiymdastyrylyp, kásipkerler arasynda B2B Matchmaking formatyndaǵy tikelei kelissózder ótedi.
Talqylanatyn negizgi bastamalardyń qatarynda OMODA, JAECOO jáne Li Auto markaly avtomobilder óndirisin Qazaqstanda jolǵa qoiý bar. Budan bólek, Quryq portyn damytý, «Qorǵas» shekara mańynda «aqyldy» logistikalyq park qurý jáne Xinfa kómir-himiia keshenin iske qosý jobalary usynylady.
Aýqymdy bastamalardyń biri – Qytaidyń UBTECH kompaniiasynyń Qazaqstanda gýmanoid robottar shyǵaratyn zaýyt salýy. Bul kásiporyn kompaniianyń Qytai aýmaǵynan tys jerde ashylatyn alǵashqy óndiris orny bolmaq.
Sondai-aq BeOne jáne INKAR kompaniialary onkologiialyq aýrýlardy emdeýge arnalǵan dári-dármek óndirisin Qazaqstanda jergiliktendirýdi kózdep otyr. Jobalar júzege assa, otandyq farmatsevtika óndirisin damytýǵa, tehnologiia transferine jáne joǵary tehnologiialar salasyna jańa investitsiia tartýǵa múmkindik beredi.
