Almaty ákimi Darhan Satybaldy Memleket basshysynyń atynan aqyn ári qoǵam qairatkeri Oljas Súleimenovti 90 jas mereitoiymen quttyqtady, dep habarlaidy dalanews.kz.
Darhan Satybaldy Qazaqstannyń Halyq jazýshysynyń shańyraǵyna baryp, el Prezidenti Qasym-Jomart Toqaevtyń quttyqtaý hatyn oqyp berdi.
"Siz Qazaqstanda ǵana emes, halyqaralyq deńgeide de kórnekti aqyn, tereń oily qalamger ári bedeldi qoǵam qairatkeri retinde syi-qurmetke ie boldyńyz. Sizdiń gýmanistik ideialaryńyz ulttyq mádeniet pen qoǵamdyq-saiasi oidyń asyl murasyna ainalyp, álemge keńinen tanyldy. Biregei shyǵarmashylyǵyńyz arqyly qazaq halqynyń tarihi sanasynyń jańǵyrýyna ólsheýsiz úles qostyńyz", — delingen Memleket basshysynyń quttyqtaýynda.
Almaty ákimi Oljas Súleimenovke ádebietti, qoǵamdyq oi men iadrolyq qarýǵa qarsy qozǵalysty damytýǵa qosqan ólsheýsiz úlesi úshin alǵys bildirdi. Ol qalamgerdiń bastamasymen qurylǵan "Nevada-Semei" qozǵalysy iadrolyq synaqtarǵa qarsy kúrestiń simvolyna ainalyp, Semei iadrolyq poligony jabylýyna mańyzdy ról atqarǵanyn jetkizdi.
Oljas Súleimenovtiń esimi táýelsiz Qazaqstan tarihyna altyn árippen jazylǵan. XX-XXI ǵasyrlardaǵy kórnekti aqyn, zańǵar jazýshy óziniń ádebi murasymen ǵana emes, belsendi qoǵamdyq-saiasi qyzmetimen de álemge keń tanyldy. Onyń shyǵarmalary kóptegen tilge aýdarylyp, kóp taralymmen jaryq kórip, oqyrman qaýymnyń suranysyna ie bolyp keledi.
